GBIME

ऋण दिने समातिए, वित्तीय अराजकता फैलाउनेलाई केहि हुँदैन ?

ऋण दिनेलाई समात्ने पुलिस ऋण खाएर तिर्दिन भन्नेलाई सलाम ठोक्छ

19.09K
shares

काठमाडौं, १६ फागुन । बैंकर मनोज न्यौपाने प्रभु बैंकको डेपुटी सीईओमा बहाल रहेकै बेला प्रहरीको गिरफ्तारीमा परे । न्यौपानेसँगै करिब आधा दर्जन अन्य कर्मचारीहरु र बैंकिङ क्षेत्रबाट रिटायर्ड भएका तुलसीराम गौतमको हातमा पनि हत्कडी लागेको छ ।

तत्कालिन सेञ्चुरी कमर्सीयल बैंकको सीईओ रहेका बेला न्यौपानेले गरेका बद्मासीहरु धेरै छन् । भलै अहिलेको पक्राउ प्रहरण फरक हो । यो प्रकरणमा तुलसीराम गौतम जस्ता राम्रो छवी बनाएका बैंकर पनि पक्राउ पर्नु आफैमा दुखद् हो । यो प्रकरण पछि धेरै बैंकरको शिर निहुरिएको छ । बैंकरहरु अनाहकमा दुःख पाइने हो कि भनेर निराश छन् ।

बैंकर मनोज ज्ञवालीको बुझाइमा कमसल धितोमा ऋण दिएकै अभियोगमा जेलमा कोच्ने हो भने त बैंकका क्रेडिट विभागमा काम गरेका हाकिमहरु अधिकांश जेल जानेछन् । अन्य बैंकहरुले पनि यसको खुलेरै विरोध गरेका छन् ।

बैंकिङ क्षेत्रमा निकै लामो अनुभव भएका बैंकर सुमन शर्मा पनि सीईओलाई यसरी पक्राउ गर्नु गलत भएको बताउछन् । यो विषयलाई सामान्य रुपमा बुझ्न नहुने उनको भनाइ छ । शर्मा र ज्ञवालीमात्रै होइन बैंकर्स संघले नै यो प्रकरणको आपत्ति जनाएको छ । यस विषयमा सरकारका अधिकारीहरुलाई भेटेर आपत्ति जनाउने बैंकर्स संघले औपचारिक निर्णय नै गरेको छ ।

याे पनि पढ्नाेस् : सरकार ! दुर्गा प्रसाईलाई छाडा छाडेर सफल होला त लगानी सम्मेलन ?

गल्ती गर्ने जो कोहीलाई कानूनी सजाय हुनैपर्छ । यसमा कसैको फरक मत नहोला । तर, पछिल्ला घटनाक्रमले भने प्रहरीको भूमिकाप्रति शंका पैदा गराउछ । ऋण लिएर नतिर्नेलाई प्रहरी आफैले संरक्षण दिएको छ, उसको सुरक्षामा खटिएको छ । अहिले ऋण खाएर तिर्दिन भन्नेहरुको एउटा जमात छ । जुन जमातको नेतृत्व दुर्गा प्रसाईंले गरिरहेका छन् ।

दुर्गा प्रसाईं आफै बैंक डिफल्टर हुन् । उनले ऋण लिएर धेरै बैंकको तिरेका छैनन् । आफूले तिरेनन्, अरुलाई पनि ऋण नतिरौँ भनेर वित्तीय अराजकता फैलाइरहेका छन् । प्रसाईंले ऋण खाएपछि तिर्नुपर्छ भन्ने मान्यतालाई उल्टाउन मात्रै खोजेका छैनन्, देशमा अशान्ती मच्चाउने अभिव्यक्ति दिइरहेका छन् । उनले एनआईशी एयिशा बैंक डुब्छ भनेर सामाजिक सञ्जालमै लेखे । उनले लेखेको कुराकै आधारमा पनि प्रहरीले चाहेको भए पक्राउ गरेर अनुसन्धान गर्न सक्थ्यो । प्रहरीले मुद्दा चलाएको भए सम्भवतः प्रसाई यतिबेला जेलमा हुन्थे ।

तर, प्रहरीले किन यसो गर्थो । दुर्गा प्रसाईहरुलाई त सरकारले नै छाडा छाडेको छ । बोरु कानून मान्छौँ, कमजोरी भएको भए सजायको भागेदार बन्छौँ भन्नेहरु प्रहरी हिराशतमा पुगेका छन् ।

ऋण दिनू अपराध, अनि ऋण नतिर्नु चाहिँ !

बैंक तथा वित्तीय संस्थाका बारेमा पछिल्लो समय फैलिरहेको अराजकताका बारेमा गृहमन्त्री नारायणकाजी श्रेष्ठ र प्रहरी प्रमुख बसन्तबहादुर कुँवर पूर्ण रुपमै जानकार छन् । उनीहरुलाई पनि प्रसाईका धेरै अभिव्यक्ति र क्रियाकलाप गैरकानूनी छन् भन्ने कुरामा जानकारी छ । तर, सोझा बैंकरलाई समात्न हौसिने प्रहरी बद्मासलाई कारबाही गर्न सक्दैन ।

कमसल धितोमा ऋण दिएको अभियोगमा पक्राउ गर्ने प्रहरी कमसल धितो राखेर झुक्काएर ऋण लिनेलाई समात्न सक्दैन । नेपालको कानून अनुसार चल्ने व्यक्तिलाई पक्राउ गर्ने प्रहरी खुलेआम वित्तीय अराजकता फैलाउनेलाई पक्राउ गर्न सक्दैन ।

गृहमन्त्री श्रेष्ठको कार्यकालमा ठूला काण्डका फाइलहरु खोलिएका छन् । तर, वित्तीय क्षेत्रको अराजकता रोक्न पहल हुन सकेको छैन । यो देशमा छाडातन्त्र छ भन्ने कुरा सरकारकै कारण पनि पुष्टि भएको छ । बैंक सिद्धिए के हुन्छ ? भन्ने कुराको सामान्य चेत पनि गृहमन्त्री र अहिलेको प्रहरी नेतृत्वमा देखिएको छैन । वित्तीय अराजकता विरुद्ध गृहमन्त्री मुकदर्शक नै बनेका छन् ।

बैंकर दोषि छन् भने पक्राउ गर्नुपर्छ । कारबाही हुनुपर्छ । यतिभन्दै गर्दा कानूनको परिधि भित्रमा रहेकालाई हत्कडी लगाउनेले गैरकानूनी अभियान चलाउनेहरुलाई चाहिँ केही गर्न पर्दैन ? ऋण दिनेलाई समात्ने अनि ऋण नतिर भन्नेलाई सलाम ठोक्ने ? यो कस्तो कानूनी राज्य हो ? अहिलेको सरकार, केन्द्रीय बैंक र प्रहरी नेतृत्वले बेलैमा यसबारे सोच्नु पर्छ ।

नत्र वित्तीय अराजकताले बैंकका केही लगानीकर्तामात्रै होइन देशको अर्थतन्त्र स्वाहाँ बनाउछ । श्रीलंकाको कहानी हामीले धेरै सुन्यौँ । यहीँ तरिका हो भने श्रीलंकामात्रै होइन, श्रीलंकाको ‘बाउँ’ भन्ने खतरा नेपालको छ । बेलैमा सोचौँ । कानून सबैलाई बराबरी होस् ।

Follow Up

प्रभु बैंकका डिसिईओ पक्राउको विषयमा बैंकर्स संघको बैठक : धरपकड नरोकिए बैंकिङ काम नै ठप्प पार्नेसम्मको निर्णय

प्रभु बैंकका डिसिईओ पक्राउको विषयमा बैंकर्स संघको बैठक : धरपकड नरोकिए बैंकिङ काम नै ठप्प पार्नेसम्मको निर्णय

प्रभु बैंकका डेपुटी सीईओ पक्राउ

प्रभु बैंकका डेपुटी सीईओ पक्राउ

सेञ्चुरी बैंकको बदमासीले व्यवसायी सडकमा

सेञ्चुरी बैंकको बदमासीले व्यवसायी सडकमा

किन समातिए प्रभु बैंकका डिसिईओ ? यस्तो छ इतिवृतान्त

किन समातिए प्रभु बैंकका डिसिईओ ? यस्तो छ इतिवृतान्त

‘६ महिना मात्र कर्पोरेट/इन्फ्रामा कर्जा दिन बसेका कुनै बैंकर जेल बाहिर हुदैनन’

‘६ महिना मात्र कर्पोरेट/इन्फ्रामा कर्जा दिन बसेका कुनै बैंकर जेल बाहिर हुदैनन’

सरकार ! दुर्गा प्रसाईलाई छाडा छाडेर सफल होला त लगानी सम्मेलन ?

सरकार ! दुर्गा प्रसाईलाई छाडा छाडेर सफल होला त लगानी सम्मेलन ?