मौद्रिक नीतिको अर्धवार्षिक समीक्षा : अधिकांश यथावत, अर्थतन्त्र चलायनमान बनाउने गरी नीतिगत परिवर्तन
वि.सं.२०८० माघ २९ सोमवार ११:०४
4.3K
shares
shares
राष्ट्र बैंकका गभर्नर महाप्रसाद अधिकारी
काठमाडौं, २९ माघ । नेपाल राष्ट्र बैंकले चालु आर्थिक वर्षका लागि ल्याएको मौद्रिक नीतिको अर्धवार्षिक समीक्षा आज सोमबार गर्दैछ । सोमबार साझ सार्वजनिक गर्ने गरी केन्द्रीय बैंकले आवश्यक तयारी गरेको हो ।
केन्द्रीय बैंकका प्रवक्ता डा. गुणाकर भट्टले मौद्रिक नीतिको समीक्षा सोमबार हुनसक्ने सम्भावना रहेको बताए । ‘बोर्डले पारित गर्यो भने सार्वजनिक हुन्छ, बोर्ड बैठक कतिबेला बस्छ भन्ने चाहिँ मलाई जानकारी छैन’ केटिएम भ्वाइससँग प्रवक्ता भट्टले भनेका छन् ।
केन्द्रीय बैंकको अर्को श्रोतले सोमबार साझका लागि सञ्चालक समिति बैठक बोलाएको पुष्टि गरेको छ । साझ बस्ने सञ्चालक समितिको बैठकमा मूल एजेण्डाका रुपमा नै मौद्रिक नीतिको समीक्षा रहेको छ ।
अधिकांश विद्यमान व्यवस्था यथावत
चालु आर्थिक वर्षका लागि ल्याएको मौद्रिक नीति र पहिलो त्रैमासिक समीक्षामा भएका अधिकांश नीतिहरुलाई नै निरन्तरता दिने केन्द्रीय बैंकको तयारी छ । यद्यपि, केही नीतिगत व्यवस्थाहरु भने परिवर्तन हुनेछन् । पहिलो त्रैमासिक समीक्षा र हालको अवस्था फरक रहेकाले केही नीतिहरु परिवर्तन गर्ने केन्द्रीय बैंकको तयारी छ ।
पहिलो त्रैमासिकसम्मको मुलुकको अर्थतन्त्रको अवस्था फरक थियो । बाह्य क्षेत्रको दवावमा अर्थतन्त्र थियो । बैंक तथा वित्तीय संस्थाहरुले पनि लगानी योग्य रकम (तरलता), ब्याजदर लगायतका समस्याहरु थिए ।
‘तर अहिले अवस्था फरक छ, बैंकहरुमा लगानी नभएर रकम थुप्रिएको छ भने, ब्याजदर पनि लगतार घट्दो क्रममा रहेको छ’ केन्द्रीय बैंकका एक अधिकारीले भने, ‘अन्य क्षेत्रमा पनि केही व्यवस्थाहरु परिवर्तन गर्नुपर्नेछ, मुलुकको अर्थतन्त्रलाई चलायमान बनाउने गरी मौद्रिक नीतिको समीक्षा हुन्छ ।’
Follow Up
