काठमाडौं, १७ पुस । मेटलाइफ नेपालले नेपाल सरकारको भौतिक पूर्वाधार पुनःनिर्माण कोषमा २५ लाख रुपैयाँ आर्थिक सहयोग प्रदान गरेको छ।

कम्पनीले यस हप्ता माननीय अर्थमन्त्री रामेश्वर प्रसाद खनाललाई उक्त सहयोग रकम हस्तान्तरण गरेको हो। मेटलाइफ नेपालले यो सहयोगमार्फत देशका भौतिक संरचनाहरूको पुनःनिर्माणमा सरकारको प्रयासलाई साथ दिनुका साथै स्थानीय समुदायहरूको हितप्रति आफ्नो निरन्तर प्रतिबद्धता व्यक्त गरेको जनाएको छ। पुनःनिर्माण कार्यमा योगदान पुर्‍याई जनजीवन सहज बनाउने उद्देश्यले सहयोग प्रदान गरिएको कम्पनीको भनाइ छ।

मेटलाइफ नेपाल सन् २००१ देखि नेपालमा सञ्चालनमा रहेको अमेरिकन लाइफ इन्स्योरेन्स कम्पनी (मेटलाइफ) को सहायक संस्था हो। कम्पनीले नेपालमा व्यक्तिगत तथा संस्थागत ग्राहकहरूलाई जीवन बीमा, दुर्घटना तथा स्वास्थ्य बीमा, साथै सामूहिक बीमा जस्ता विविध बीमा योजनाहरू उपलब्ध गराउँदै आएको छ।

मेटलाइफ नेपालले भविष्यमा पनि सामाजिक उत्तरदायित्वका कार्यक्रममार्फत देशको दिगो विकास र समुदाय सशक्तीकरणमा योगदान जारी राख्ने प्रतिबद्धता जनाएको छ।