काठमाडौं, ९ माघ । अभियान लघुवित्त वित्तीय संस्था लिमिटेडका प्रमुख कार्यकारी अधिकृत (सीईओ) तेजेन्द्र लम्सालले जेन–जी आन्दोलन र कर्जा मीनाहासम्बन्धी चर्चाले लघुवित्त वित्तीय संस्थाको नियमित लयमा असर पुगेको बताएका छन् । केटिएम भ्वाइसले सुरु गरेको ‘लघुवित्त फोकस’ सिरिजमा कुरा गर्दै सीईओ लम्सालले यस्तो बताएका हुन् ।

लघुवित्त क्षेत्र बिस्तारै सुधारको दिशामा जान लागेको बेला पछिल्लो समय कर्जा मीनाहाको हल्लाले सदस्यहरू ‘पर्ख र हेर’को अवस्थामा पुगेको उनको भनाइ छ। “जेन–जी आन्दोलनपछि अवस्था बिस्तारै लयमा आउँदै थियो, तर कर्जा मीनाहाको कुरा मिडियामा आएपछि फेरि केही बिग्रिएको देखिन्छ,” उनले भने।

उनका अनुसार विशेषगरी एक लाख रुपैयाँसम्मको कर्जा मीनाहा हुने भन्ने प्रचारले सदस्यहरूमा भ्रम सिर्जना गरेको छ, जसको असर कर्जा रिकभरीमा देखिएको छ। “रिकभरी सुधारिएको भन्न मिल्ने अवस्था छैन। एक लाखसम्मको कर्जा मीनाहा भन्ने कुराले केही सदस्यहरूलाई असर गरेको छ,” उनले भने।

बैंकिङ क्षेत्रमा देखिएका ठूला घटनाजस्तो अवस्था लघुवित्तमा नरहे पनि केही संस्थामा साना–ठूला समस्या देखिएको उनले स्वीकारे। “हाम्रो संस्थामा भने कुनै घटना भएको छैन। समग्र लघुवित्त क्षेत्रमा पनि बैंकहरूजस्तो ठूलो समस्या छैन,” उनले भने, “पहिले लघुवित्तमा कर्जा तिर्नुपर्छ भन्ने वातावरण बनेको थियो, तर मीनाहाको चर्चाले केही हदसम्म डिस्टर्ब गरेको छ।”

आफ्नो संस्थाको अवस्थाबारे बोल्दै लम्सालले अभियान लघुवित्त सबैभन्दा कान्छो लघुवित्त संस्था रहेको बताए। “कोभिड कालमै संस्थाको स्थापना भएको हो। अहिले हामी आफैँलाई एक गतिको दिशामा लैजान प्रयासरत छौँ,” उनले भने। पछिल्लो समय संस्थाले आन्तरिक सुधार गर्दै गएको उनको दाबी छ।

चालु आर्थिक वर्षको पहिलो त्रैमासिक फस्ट क्वाटर नतिजाबारे भने उनले अपेक्षाअनुसार नै रहेको प्रतिक्रिया दिए। “बजेट अनुसारको त भएन, तर समग्रमा ठीकै भएको छ,” उनले भने।

सम्पादकीय नोटः लघुवित्तबारे अझ प्रष्ट हुन केटिएम भ्वाइसले ‘लघुवित्त फोकस’ सिरिज सुरु गरेको छ । यस सिरिज अन्तर्गत पहिलो चरणमा हामी पालैपालो सबै लघुवित्तका सीईओहरुसँग कुराकानी गरेर समाचार पस्कनेछौँ । तत् पश्चात भने लघुवित्त क्षेत्रका सरोकारवालाको अन्तरवार्ता प्रस्तुत गर्नेर्छौ । तपाईलाई पनि आफ्नो कुरा राखौँ भन्ने लागेको छ भने प्रधानसम्पादक (९८५११४५६४१) मा सिधैं सम्पर्क गर्न सक्नु हुनेछ ।

Follow Up