काठमाडौं, ६ माघ । नाडेप लघुवित्त वित्तीय संस्था लिमिटेडका प्रमुख कार्यकारी अधिकृत (सीईओ) दीर्घ बहादुर अर्यालले लघुवित्त क्षेत्रमा लगानी र असुली दुवै चुनौतीपूर्ण अवस्थामा रहेको बताएका छन् । केटिएम भ्वाइसले सुरु गरेको ‘लघुवित्त फोकस’ सिरिजमा कुरा गर्दै सीईओ अर्यालले यस्तो बताएका हुन् ।

पछिल्लो समय विभिन्न स्थानमा देखिएका सामाजिक र प्रशासनिक अवरोधका कारण असुली प्रक्रियामा समस्या आएको उनको भनाइ छ । सीईओ अर्यालका अनुसार लघुवित्त संस्थाहरूले नियमित रूपमा कार्यक्रम सञ्चालन गरिरहेका भए पनि नयाँ लगानी अपेक्षित रूपमा हुन सकेको छैन । “लगानी भएका ऋणहरूको असुली पनि सन्तोषजनक छैन,” उनले भने, “ठाउँ–ठाउँमा देखिएका घटनाक्रमले वित्तीय संस्थाहरूलाई असुली प्रक्रियामा कठिनाइ सिर्जना गरेको छ ।”

रिकभरीको अवस्था खासै सुधारिएको जस्तो नदेखिए पनि पछिल्लो चरणमा विभिन्न अभियानहरू सञ्चालन भइरहेका अर्यालले बताए । असुली नगरेका ऋणीलाई कालोसूचीमा राख्न वा पत्रपत्रिकामा सूचना प्रकाशन गर्नसमेत समस्या देखिएको उनको भनाइ छ । यद्यपि, जहाँ यस्ता अवरोधहरू छैनन्, ती स्थानमा असुली अवस्था राम्रो रहेको उनले बताए ।

 बैंकसँग सम्बन्धित घटनाजस्तो अवस्था नाडेप लघुवित्तमा नरहेको सीईओ अर्यालले बताए । लघुवित्त संघसंस्थाबाट प्राप्त जानकारीअनुसार नाडेपमा कुनै गम्भीर घटना नभएको उनले बताए। “हामीले कर्मचारीलाई संयमित र नरम व्यवहार अपनाउन निर्देशन दिएका छौँ,” उनले भने, “समस्यामा परेका ऋणीहरूको पहिचान गरी उनीहरूसँग सकारात्मक व्यवहार गर्ने, कार्यक्रमहरु पनि गरिरहेका छौँ ।”

संस्थाको समग्र अवस्था सन्तोषजनक रहेको उल्लेख गर्दै अर्यालले गत वर्षको तुलनामा नाडेपको प्रगति वृद्धि हुँदै गएको जानकारी दिए । असुली सुधारका लागि विभिन्न स्थानमा कार्यक्रम सञ्चालन गर्नुका साथै बीउ–बिजन वितरण, समूह तथा सदस्यसँग प्रत्यक्ष छलफल, र वित्तीय साक्षरतामा जोड दिइएको उनले बताए ।

उनका अनुसार हालसम्म करिब १५ वटा वित्तीय साक्षरता कार्यक्रम सम्पन्न भइसकेका छन् । चालु आर्थिक वर्षको पहिलो त्रैमासिक (फस्ट क्वाटर) पनि उत्साहजनक रहेको बताउँदै उनले असोजसम्मको तुलनामा पुससम्मको प्रगति राम्रो भएको बताएका छन् ।

सम्पादकीय नोटः लघुवित्तबारे अझ प्रष्ट हुन केटिएम भ्वाइसले ‘लघुवित्त फोकस’ सिरिज सुरु गरेको छ । यस सिरिज अन्तर्गत पहिलो चरणमा हामी पालैपालो सबै लघुवित्तका सीईओहरुसँग कुराकानी गरेर समाचार पस्कनेछौँ । तत् पश्चात भने लघुवित्त क्षेत्रका सरोकारवालाको अन्तरवार्ता प्रस्तुत गर्नेर्छौ । तपाईलाई पनि आफ्नो कुरा राखौँ भन्ने लागेको छ भने प्रधानसम्पादक (९८५११४५६४१) मा सिधैं सम्पर्क गर्न सक्नु हुनेछ ।

Follow Up