काठमाडौं, १५ वैशाख । नेकपा एमालेका तर्फबाट प्रतिनिधि सभाका विषयगत समितिमा रहने सांसदहरुको टुंगो लागेको छ । अर्थतन्त्रसँग जोडिएको प्रमुख संसदीय समिति अर्थ समितिमा रहने सदस्यहरुको समेत एमालेले टुंगो लगाएको छ ।

कार्यविभाजन अनुसार २ पटक अर्थमन्त्री भइसकेका एमाले उपाध्यक्ष विष्णु प्रसाद पौडेल अर्थसमितिमा रहनेछन् । यसैगरी उग्र भाषण गर्ने सूर्य थापा समेत अर्थ समितिमै रहने भएका छन् । थापा पहिलो पटक संसद प्रवेश गरेका हुन् । यसैगरी उदयपुर क्षेत्र नम्बर २ बाट पहिलो पटक चुनाव जितेका अमर रायमाझी पनि अर्थ समितिमै रहनेछन् ।

यसबाहेक जुली महतो, भगवती चौधरी, नारायण प्रसाद आचार्य र रणकुमारी बलम्पाकी मगर समेत अर्थसमितिमै रहनेछन् । एमालेका भद्र, बौद्धिक र अध्ययनशील नेताको छवी बनाएका पदम गिरी पनि संसदको अर्थ समितिमै रहनेछन् । गिरी प्रचण्ड नेतृत्वको सरकारमै छोटो समय मन्त्री भएका थिए ।

को बन्ला सभापति ?

अर्थतन्त्रसँग चासो राख्नेहरुका लागि अर्थ समिति निकै महत्वपूर्ण समिति हो । अघिल्ले संसदमा सत्ताको नेतृत्व गरेको एमालेले नै यो समितिको सभापति राखेको थियो । त्यबेला कृष्ण दाहाल अर्थ समितिको सभापति थिए ।

अर्थमन्त्रालय, नेपाल राष्ट्र बैंक, नेपाल धितोपत्र बोर्ड, बीमा समिति जस्ता निकायहरुलाई बोलाएर छलफल गर्ने तथा आवश्यक निर्देशनहरु काम यस समितिले गर्दै आएको छ । अबको सभापति को भन्ने भन्ने विषयमा भने एमालेले टुंगो लगाइसकेको छैन् ।