काठमाडौं, २१ भदौ । नेपालमा हुन्डाई गाडीहरूको एकमात्र आधिकारिक वितरक लक्ष्मी इन्टरकन्टिनेन्टल प्रा.लि.ले भदौ २० गते वीरगंज-११, श्रीपुर मुर्लीमा आफ्नो नयाँ शोरूमको औपचारिक उद्घाटन गरेको छ। यस नयाँ शोरूममार्फत वीरगंजसहित सिमरा, कलैया, चन्द्रनिगाहपुर र आसपासका क्षेत्रका ग्राहकहरूलाई हुन्डाईका प्रिमियम गाडीहरू तथा सेवा सुविधाहरू उपलब्ध गराइनेछ।

आधुनिक पूर्वाधारसहित निर्माण गरिएको वीरगंजको यो शोरूमले ग्राहकहरूलाई अन्तर्राष्ट्रिय स्तरको सेवा अनुभव प्रदान गर्ने लक्ष्य राखेको छ। उद्घाटन समारोहले नेपालभरि आफ्नो पहुँच विस्तार गर्ने हुन्डाईको दीर्घकालीन योजनालाई प्रतिबिम्बित गर्छ।

हुन्डाई लामो समयदेखि नेपालमा उत्कृष्ट गुणस्तर, सुरक्षा र उच्च प्रदर्शन भएका गाडीहरूका लागि लोकप्रिय अटो ब्रान्डको रूपमा स्थापित छ। नवलपरासीको रामग्राममा नेपालकै पहिलो चारपाङ्ग्रे गाडी असेंब्ली प्लान्ट स्थापना गरेर लक्ष्मी ग्रुपले अटोमोबाइल क्षेत्रमा हुन्डाईको उपस्थिति थप मजबुत बनाएको छ।

शोरूम विस्तारको यो प्रयास हुन्डाईको देशव्यापी यातायात पूर्वाधार सुदृढीकरण योजनाको एउटा महत्वपूर्ण भाग हो। कम्पनीले बिक्री सञ्जाल, सेवा केन्द्र तथा ग्राहक सेवा सम्पर्क बिन्दुहरूलाई विस्तार गर्दै नेपालभरका ग्राहकहरूलाई सहज, दिगो र प्रिमियम अनुभव प्रदान गर्ने उद्देश्य राखेको छ।

यस नयाँ शोरूमको सञ्चालनसँगै हुन्डाईले आफ्नो ब्रान्डको विश्वास, उत्कृष्टता र ग्राहकप्रतिको प्रतिबद्धतालाई पुनः पुष्टि गरेको छ।