काठमाडौं, १९ कार्तिक । थाई एयरवेज इन्टरनेशनल पब्लिक कम्पनी लिमिटेडले नेपालमा पहिलोपटक तीन वर्गीय सुविधा सहितको नयाँ विमान सञ्चालनमा ल्याएको छ। असोज १ गतेदेखि काठमाडौं बैंकक मार्गमा नयाँ एयरबस ए–३३०–३०० विमानमार्फत नियमित सेवा सुरु गरिएको कम्पनीले जनाएको छ। यससँगै नेपाली यात्रुहरूले अब उच्च श्रेणी इकोनोमी प्लस, मध्यम श्रेणी इकोनोमी, र साधारण इकोनोमी गरी तीन फरक वर्गमा यात्रा गर्न सक्ने भएका छन्।

यो नयाँ सेवा कम्पनीले पहिले प्रयोग गर्दै आएको बोइङ ७७७ विमानको सट्टामा सुरु गरिएको हो। कम्पनीका अनुसार यात्रुहरूको सुविधा, आराम र उडान अनुभवलाई अझ उन्नत बनाउन यो रणनीतिक सुधार गरिएको हो।

कार्तिक ९ गतेदेखि थाई एयरवेजले नयाँ विमानमार्फत दैनिक दुई पटक काठमाडौंमा उडान सञ्चालन गरिरहेको छ। नयाँ विमानमा कुल २६४ यात्रु सिट रहेको छ, जसलाई यात्रुहरूको आवश्यकता र रुचिअनुसार तीन भागमा विभाजन गरिएको छ।

उच्च श्रेणी इकोनोमी प्लस वर्गमा ३१ वटा सिट रहेका छन्, जसमा सिटलाई सिधा बेडमा रूपान्तरण गर्न सकिने सुविधा, फराकिलो ठाउँ, प्रत्यक्ष बाटो पहुँच र व्यक्तिगत गोपनीयताको उच्च स्तर प्रदान गरिएको छ।

मध्यम श्रेणी इकोनोमी वर्गमा ४८ वटा फराकिला र आरामदायी सिट रहेका छन्, जहाँ यात्रुहरूले विशेष खानाको सेवा, प्राथमिक चढाइ ९बोर्डिङ० सुविधा र थप आरामको अनुभव पाउनेछन् ।
साधारण इकोनोमी वर्गमा १८५ सिट रहेका छन्, जसमा मनोरञ्जन प्रणाली, निःशुल्क खानाको व्यवस्था र दक्ष केबिन कर्मचारीको सेवा उपलब्ध छ।

थाई एयरवेजले आफ्नो प्रसिद्ध नारा “रेशमझैँ सहज सेवा” अन्तर्गत नेपाल–बैंकक मार्गमा यात्रुहरूलाई थप सहज, सुरक्षित र आधुनिक सेवा उपलब्ध गराउने लक्ष्य राखेको जनाएको छ। कम्पनीले नेपालस्थित आफ्नो सामान्य बिक्री प्रतिनिधि (जीएसए) सोसाइटी इन्टरनेशनल यात्रा सेवासँग सहकार्य गर्दै देशभरका यात्रा व्यवसायीहरूका लागि नयाँ विमान र सेवा सम्बन्धी तालिम सञ्चालन गरेको थियो। ती कार्यक्रममा ट्राभलपोर्ट ग्यालिलियो नेपाल र सेबर नेपालका प्रतिनिधिहरू पनि सहभागी थिए।

उक्त तालिममार्फत नेपालका यात्रा व्यवसायीहरूलाई नयाँ विमानको संरचना र सेवा सुविधाबारे जानकारी प्रदान गरिएको थियो, जसले यात्रुहरूको आवश्यकता अनुसार सही सल्लाह दिन सजिलो बनाएको कम्पनीले जनाएको छ।

थाई एयरवेज र सोसाइटी इन्टरनेशनल यात्रा सेवाबीचको सहकार्यले सन् २०२३ मा पुनः सेवा सुरु भएदेखि नेपालमा एयरलाइन्सको उपस्थितिलाई थप मजबुत बनाएको छ। यससँगै काठमाडौं र बैंककबीचको हवाई सम्पर्क र सेवा स्तरमा उल्लेखनीय सुधार आएको कम्पनीको दाबी छ। नयाँ तीन वर्गीय विमान सञ्चालनसँगै नेपाली यात्रुहरूले अब थप आरामदायी, आधुनिक र स्तरिय अन्तर्राष्ट्रिय उडान अनुभव लिन सक्ने भएका छन्।