बाढीपहिरो र विपद्ले अर्थतन्त्रका अन्य क्षेत्रमा निराशा छाइरहेका बेला सरकारले अघि सारेको नीतिगत सुधारको प्रयासले सेयर बजारमा भने अचानक चमक ल्याएको छ। अर्थ मन्त्रालयले ‘पुँजी बजार सुदृढीकरण तथा पुनरुत्थान कार्ययोजना, २०८३’ मार्फत २१ बुँदे सुधारका कार्यक्रम घोषणा गरेपछि मंगलबार नेप्से परिसूचक ४८.५७ अंकको फराकिलो वृद्धि सहित २ हजार ६ सय ३३.६२ विन्दुमा उक्लियो। यद्यपि, बजारमा देखिएको यो उत्साह र प्राविधिक चार्टमा देखिएको नाफा बुक गर्ने हाबी प्रवृत्तिका बीच आज (बुधबार) को बजार कुन दिशामा अघि बढ्छ भन्ने आम लगानीकर्ताको चासोको विषय बनेको छ।

हिजोको बजारले आजको कारोबारका लागि केही बलिया र सकारात्मक आधारहरू तय गरेको छ। सोमबार ४ अर्ब ६८ करोड रुपैयाँ हाराहारीमा सीमित भएको कारोबार मंगलबार झन्डै दोब्बरले बढेर ८ अर्ब २९ करोड रुपैयाँ नाघ्नुले बजारमा नयाँ पुँजीको प्रवेश भएको बलियो संकेत गर्छ। कारोबारमा आएका १३ वटै उपसमूहका सूचक उकालो लाग्नुका साथै ३४७ मध्ये २६५ कम्पनीको सेयर मूल्य बढ्नुले बजारमा खरिदकर्ताको उच्च मनोबललाई पुष्टि गरेको छ। विशेषगरी निर्जीवन बीमा, वित्त र लगानी जस्ता उपसमूहमा देखिएको आकर्षणले बजारको वृद्धि कुनै निश्चित समूहमा मात्र सीमित नरही फराकिलो (ब्रोड–बेस्ड) बन्दै गएको देखाउँछ।

आधारभूत रूपमा बजार सकारात्मक देखिए पनि प्राविधिक विश्लेषणले भने आजका लागि केही सतर्कता अपनाउनुपर्ने संकेत गरेको छ। मंगलबार बजार २६७१.०९ विन्दुमा ‘ग्याप अप’ ओपनिङ भएर २६७९.९० को उच्च विन्दुसम्म पुगे पनि त्यो उत्साह अन्तिम समयसम्म टिक्न सकेन। उच्च विन्दुमा पुग्नेबित्तिकै नाफा सुरक्षित गर्ने (सेलिङ प्रेसर) लगानीकर्ताहरू हाबी हुँदा बजार ओरालो लागेर बन्द भयो। फलस्वरूप, बजार बढेर बन्द भए पनि हिजोको ओपनिङभन्दा क्लोजिङ विन्दु तल हुँदा चार्टमा ‘सुटिङ स्टार’ वा ‘इन्भर्टेड ह्यामर’ जस्तो रातो क्यान्डल बनेको छ। यसले २६७३ को पहिलो प्रतिरोध विन्दु (रेजिस्टेन्स) आसपास कडा बिक्री चाप रहेको प्रमाणित गर्छ, जसको प्रभाव आजको सुरुवाती कारोबारमा पनि पर्न सक्ने विश्लेषकहरूको अनुमान छ।

यद्यपि, प्राविधिक इन्डिकेटरहरूले बजारको आन्तरिक शक्ति अझै मजबुत रहेकोतर्फ इसारा गरेका छन्। बजारको गति मापन गर्ने आरएसआई (RSI) सूचक ५८.४६ को ‘बुलिस जोन’ मा उक्लिएको छ भने, लामो समयदेखि घट्दो क्रममा रहेको म्याक्डी (MACD) ले पनि ‘बुलिस क्रसओभर’ दिएको छ। म्याक्डीको हिस्टोग्राम शून्य रेखाभन्दा माथि गएर सकारात्मक बन्नु र इचिमोकु क्लाउडको बेसलाइन पार गर्ने प्रयास हुनुले खरिदकर्ताहरू अझै बलियो अवस्थामा रहेको देखाउँछ। ट्रेडरहरूले यसलाई बजार बाउन्स ब्याक हुने बलियो सुरुवाती संकेतका रूपमा लिएका छन्।

समग्रमा, सरकारको नीतिगत प्रयासले मनोवैज्ञानिक उत्साह थपे पनि हिजो उच्च विन्दुमा देखिएको आपूर्ति (सप्लाई) लाई आज नयाँ खरिदकर्ताले कसरी पचाइरहेका छन् भन्ने कुराले नै बजारको दिशा तय गर्नेछ। बजारले आफ्नो उकालो यात्रालाई निरन्तरता दिन आज २६७३ देखि २६८० को प्रतिरोध क्षेत्रलाई पार गरेर माथि बन्द हुनु आवश्यक छ, जुन सफल भएमा नेप्से २७५४ को नयाँ लक्ष्यतर्फ लम्किनेछ। तर, सुरुवाती बिक्री चापले बजारमा करेक्सन आएमा २६०२.३९ र २५४६.६९ को विन्दुमा बलियो टेवा (सपोर्ट) पाउने प्राविधिक विश्लेषण छ। नीतिहरू कागजमा मात्र सीमित नभई व्यवहारमा उत्रिए मात्र बजारले दीर्घकालीन स्थायित्व पाउने अपेक्षा गरिएका बेला, आजको कारोबारले बजारको आगामी लयलाई थप प्रष्ट पार्नेछ।