भक्तपुर । नेरुडे मिर्मिरे लघुवित्त वित्तीय संस्था लिमिटेडको प्रमुख कार्यकारी अधिकृत (सीईओ) पदमा मिनबहादुर बोहरा नियुक्त भएका छन्। संस्थाको सञ्चालक समितिको ४०५औँ बैठकले २०८३/०५/३० गते गरेको निर्णयअनुसार बोहराको नियुक्ति २०८३/०६/०१ गतेदेखि लागू भएको हो।

यसअघि संस्थाको प्रमुख कार्यकारी अधिकृतका रूपमा कार्यरत केशवकुमार पौडेलले व्यक्तिगत तथा घरायसी कारण देखाउँदै दिएको राजीनामा सञ्चालक समितिले २०८३/०६/०१ गतेदेखि लागू हुने गरी स्वीकृत गरेको थियो। पौडेलको राजीनामापछि रिक्त भएको सीईओ पदमा बोहरालाई नियुक्त गरिएको हो।

लामो बैंकिङ तथा लघुवित्त अनुभव

नवनियुक्त सीईओ बोहरा लघुवित्त तथा बैंकिङ क्षेत्रमा लामो व्यवस्थापकीय अनुभव भएका बैंकर हुन्। उनले कालिका लघुवित्त वित्तीय संस्था लिमिटेडमा प्रमुख कार्यकारी अधिकृत, धौलागिरी लघुवित्त वित्तीय संस्था लिमिटेडमा प्रमुख कार्यकारी अधिकृत तथा नेपाल एग्रो लघुवित्त वित्तीय संस्था लिमिटेडमा कार्यवाहक प्रमुख कार्यकारी अधिकृतको जिम्मेवारी सम्हालिसकेका छन्।

त्यस्तै, बोहराले नेरुडे मिर्मिरे लघुवित्त वित्तीय संस्था लिमिटेडमै नायब कार्यकारी प्रमुखका रूपमा समेत जिम्मेवारी निर्वाह गरिसकेका छन्।

बोहरासँग नेपाल कम्युनिटी डेभलपमेन्ट बैंकमा कार्यवाहक प्रमुख कार्यकारी अधिकृत तथा कम्पनी सचिवका रूपमा काम गरेको अनुभवसमेत छ। उनले ग्रामीण विकास बैंक (नेपाल ग्रामीण बैंक) मा शाखा प्रबन्धक तथा अनुगमन तथा मूल्याङ्कन विभागमा समेत जिम्मेवारी सम्हालेका थिए। उनको व्यावसायिक यात्राको सुरुवात ग्रामीण विकास बैंकबाट भएको हो।

वित्तीय सुधारको महत्वपूर्ण चरणमा नयाँ नेतृत्व

बोहरा प्रमुख कार्यकारी अधिकृतको जिम्मेवारीमा प्रवेश गर्दा नेरुडे मिर्मिरे लघुवित्त वित्तीय तथा व्यावसायिक सुधारको महत्वपूर्ण चरणमा रहेको छ।

आर्थिक वर्ष २०८२/८३ को चौथो त्रैमासिकको अपरिष्कृत वित्तीय विवरणअनुसार संस्थाको कुल सम्पत्ति करिब २० अर्ब ९५ करोड ९४ लाख रुपैयाँ रहेको छ। त्यस्तै, ग्राहकलाई प्रवाह गरिएको कर्जा करिब १९ अर्ब ३२ करोड २४ लाख रुपैयाँ तथा निक्षेप करिब ७ अर्ब ६९ करोड ६७ लाख रुपैयाँ रहेको छ।

उक्त अवधिमा संस्थाले २३ करोड ५९ लाख रुपैयाँभन्दा बढी खुद नाफा आर्जन गरेको छ। संस्थाको कुल जोखिमभारित सम्पत्तिको तुलनामा पुँजी कोष अनुपात ९.३८ प्रतिशत, निष्क्रिय कर्जा १९.८६ प्रतिशत, कोषको लागत ६.२७ प्रतिशत तथा ब्याजदर अन्तर ८.६३ प्रतिशत रहेको चौथो त्रैमासिकको अपरिष्कृत वित्तीय विवरणमा उल्लेख छ।

संस्थाको वर्तमान वित्तीय अवस्थाले नयाँ नेतृत्वसमक्ष कर्जा गुणस्तर सुधार, निष्क्रिय तथा भाखा नाघेको कर्जा व्यवस्थापन, प्रभावकारी कर्जा असुली, पुँजी तथा वित्तीय स्थायित्व, व्यावसायिक उत्पादकत्व र सञ्चालन दक्षता अभिवृद्धिलाई महत्वपूर्ण व्यवस्थापकीय प्राथमिकताका रूपमा प्रस्तुत गरेको छ।

नयाँ नेतृत्वसँगै नेरुडे मिर्मिरे लघुवित्तले संस्थागत सुशासन सुदृढीकरण, कर्जा असुली तथा जोखिम व्यवस्थापनमा प्रभावकारिता वृद्धि, व्यावसायिक दक्षता अभिवृद्धि, डिजिटल रूपान्तरण तथा दीगो वित्तीय स्थायित्वलाई थप प्रभावकारी बनाउने अपेक्षा गरेको छ।