काठमाडाैं, २० भदाै ।  निर्देशक दिवाकर भट्टराई चार वर्षपछि पुनः निर्देशनमा फर्किएका छन् । पछिल्लोपटक फिल्म ‘क्याप्टेन’ निर्देशन गरेका दिवाकर अब फिल्म ‘मायावी’मार्फत निर्देशनमा कमव्याक गर्न लागेका हुन् ।

निर्देशक भट्टराईले श्रीकृष्ण जन्माष्टमीको अवसर पारेर ‘मायावी’को घोषणा गरे । फिल्ममा भट्टराई स्वयंको कथा रहनेछ । निर्देशक भट्टराईले  फिल्ममा तीन ‘नायक’ र दुई ‘नायिका’ हुने जानकारी दिए ।

दुई नायिकामध्ये  नायिका दीपिका प्रसाई फाइनल भइसकेकी छन् । फिल्म ‘ऐश्वर्या’पछि दिवाकर र दीपिकाको यो दोस्रो सहकार्य हो नाताले उनीहरू श्रीमान श्रीमती हुन्। अन्य कलाकार र प्राविधिक चाँडै सार्वजनिक गरिने निर्देशक भट्टराईले जानकारी दिए ।

क्रिएटिभ सिने आर्टस्ले निर्माण गर्न लागेको फिल्ममा एसडी योगीको संगीत, राम थापा अविरलको गीत रहनेछ । फिल्म असोज २ गतेबाट फ्लोरमा जानेछ । दिवाकरले फिल्म ‘मेरो जीवन साथी’, ‘स्टुपिड मन’, ‘ड्रिम्स’, ‘ऐश्वर्य’ र ‘क्याप्टेन’ निर्देशन गरिसकेका छन् ।