काठमाडौं, ११ साउन । नेपाल राष्ट्र बैंकले उपदान तथा पेन्सन कोषमा रहेको १ अर्ब रुपैयाँ बैंक तथा वित्तीय संस्थामा मुद्दती निक्षेपका रूपमा राख्ने भएको छ। राष्ट्र बैंकले आइतबार सूचना जारी गर्दै उक्त रकम एक वर्ष अवधिका लागि निक्षेपमा राख्ने भएको हो ।

राष्ट्र बैंकले वाणिज्य बैंकमा ८० करोड, राष्ट्रियस्तरको विकास बैंकमा १५ करोड, र राष्ट्रियस्तरको फाइनान्स कम्पनीमा ५ करोड रुपैयाँ निक्षेप राख्ने जनाएको छ। उक्त निक्षेपको ब्याजदर त्रैमासिक किस्तामा भुक्तानी गरिने व्यवस्था गरिएको छ।

निक्षेप लिन चाहने बैंक तथा वित्तीय संस्थाले तोकिएको सर्तसहित मंगलबारसम्म आवेदन दिनुपर्ने छ। आवेदनमा चाहिएको रकम र प्रदान गर्न सकिने ब्याजदर उल्लेख गर्नुपर्नेछ।

केन्द्रीय बैंकले निक्षेप लिन चाहने संस्थाहरूका लागि केही शर्तहरू समेत तय गरेको छ। तीमध्ये, संस्था सञ्चालनमा आएको कम्तीमा दुई वर्ष पूरा भएको हुनुपर्ने, न्यूनतम पूँजीकोष तोकिएको सीमाभित्र रहेको, कुल खराब कर्जा ८ प्रतिशत र खुद खराब कर्जा ३ प्रतिशतभन्दा बढी नरहेको हुनुपर्ने मुख्य सर्त हुन्।

यस निर्णयमार्फत राष्ट्र बैंकले कोषको उपयोगिता बढाउनुका साथै वित्तीय संस्थाहरूबीच प्रतिस्पर्धात्मक ब्याजदरको आधारमा निक्षेप राख्ने प्रक्रिया अपनाएको छ।