काठमाडौं, २८ असोज । चालु आर्थिक वर्ष २०८२/८३ को पहिलो दुई महिनामा नेपालको शोधनान्तर स्थिति एक खर्ब ५३ अर्ब ६८ करोड रुपैयाँले बचतमा रहेको छ। नेपाल राष्ट्र बैंकले मंगलबार सार्वजनिक गरेको आर्थिक तथा वित्तीय स्थितिको विवरणले यस्तो देखाएको हो।

यो संख्याले अघिल्लो वर्षको तुलनामा उल्लेखनीय सुधार देखाएको छ। गत वर्ष सोही अवधिमा शोधनान्तर स्थिति एक खर्ब एक अर्ब ७७ करोड रुपैयाँले बचतमा रहेको थियो। अमेरिकी डलरमा तुलना गर्दा, अघिल्लो वर्षको सोही अवधिमा ७६ करोड डलर बचतमा रहेको शोधनान्तर स्थिति यस वर्ष १ अर्ब १० करोड डलरले बचतमा रहेको छ।

त्यस्तै, चालु खाता पनि सन्तुलित देखिएको छ। समीक्षा अवधिमा चालु खाता एक खर्ब ३० अर्ब ६९ करोडले बचतमा रहेको छ, जुन अघिल्लो वर्षको सोही अवधिको ५४ अर्ब ४१ करोड रुपैयाँको तुलनामा निकै सुधारिएको हो। डलरमा हेर्दा अघिल्लो वर्षको सोही अवधिमा ४१ करोडको चालु खाता बचत यसपटक ९३ करोड अमेरिकी डलर पुगेको छ।

समीक्षा अवधिमा खुद पुँजीगत ट्रान्सफर दुई अर्ब २० करोड रुपैयाँ रहेको छ, जबकि अघिल्लो वर्ष सोही अवधिमा यो एक अर्ब २० करोड थियो।

यसैगरी, प्रत्यक्ष वैदेशिक लगानी (इक्विटी मात्र) भने घटेको देखिन्छ। चालु वर्षको पहिलो दुई महिनामा १ अर्ब २७ करोड रुपैयाँ बराबरको प्रत्यक्ष वैदेशिक लगानी भित्रिएको छ, जबकि अघिल्लो वर्ष सोही अवधिमा यो रकम २ अर्ब ७१ करोड रुपैयाँ थियो।