काठमाडौं, २६ जेठ । मधेश सरकारले कक्षा १२ की छात्रालाई ल्याप्टप दिने नीति तथा कार्यक्रम ल्याएकोमा नेकपा एमालेका सांसद राजकुमार लेखीले आपत्ति जनाएका छन् ।

सरकारले मंगलबार ल्याएको नीति तथा कार्यक्रममा हिजोदेखि संसदमा छलफल सुरु भएको छ । छलफलमा भाग लिँदै सांसद लेखीले विद्यालयको शैक्षिक अवस्था सुधार्नुको साटो छात्रालाई ल्याप्टप दिने योजना ल्याएको भन्दै आपत्ति जनाए ।

उनले भने, ‘यो प्रदेशको धेरै विद्यालयमा भवनको अभाव छ । शिक्षक अभाव छ । शौचालय लथालिङ छ । तर सरकार छात्रालाई ल्याप्टप दिने कार्यक्रम ल्याएको छ । यो ठीक होइन।

विद्यालयको शैक्षिक अवस्था सुधार्न जरुरी रहेकाले विद्यालयमा भवन निर्माण गर्न, शिक्षक दरबन्दी थप्न र शौचालयको अवस्थामा सुधार ल्याउन सांसद लेखीले सरकारलाई सुझाव दिए ।

उनले बजेटको स्थिति देख्दा अहिलेको नीति तथा कार्यक्रम कार्यान्वयन गर्नेमा शंका रहेको बताए । उनले भने, ‘सरकारको नीति तथा कार्यक्रम एकातिर हुन्छ । बजेट आउछ अर्कातीर कार्यान्वयन झन फितलो हुन्छ । यताुतर सरकारको ध्यानाकर्षण गराउन चाहन्छु ।’