ओभरसोल्डबाट फर्किएको नेप्से : कस्तो रहला बजार ?
वि.सं.२०८३ भदौ १८ बिहीवार ०८:१९
585
shares
shares
काठमाडौँ — सेयर बजार परिसूचक (नेप्से) निरन्तरको गिरावटपछि ‘ओभरसोल्ड’ (अत्यधिक बिक्री) विन्दुबाट फर्किएर सकारात्मक संकेत देखाएको छ । बुधबार बजार परिसूचक १५.४४ अंकले बढेर २५३८.११ विन्दुमा बन्द भएसँगै प्राविधिक विश्लेषणले आज (बिहीबार) पनि बजार सकारात्मक लयमा अघि बढ्न सक्ने सम्भावना औंल्याएको छ । अघिल्लो दिनको कारोबारको अन्तिम समयसम्म खरिदकर्ताको उच्च चाप देखिनुले लगानीकर्तामा गुमेको मनोबल केही हदसम्म फर्किएको र आजको बजारमा पनि त्यसको सकारात्मक प्रभाव पर्न सक्ने अनुमान गर्न सकिन्छ ।
प्राविधिक चार्टका अनुसार बुधबारको बजारमा ‘बुलिस मारुबोजु’ सँग मिल्दोजुल्दो क्याण्डल बनेको छ । दिनभरको उतारचढावबीच २५१३.७० विन्दुसम्म झरेको नेप्से अन्ततः दिनकै उच्च विन्दुमा पुगेर बन्द हुनुले बजारमा खरिदकर्ताको बलियो उपस्थिति रहेको पुष्टि गर्छ । उक्त क्याण्डलको माथिल्लो भागमा कुनै धागो (अपर स्याडो) नहुनुले बजार बन्द हुने समयसम्म पनि बिक्रेतामाथि खरिदकर्ता हावी भएको देखाउँछ । बजारको गति र दिशा मापन गर्ने ‘रिलेटिभ स्ट्रेन्थ इन्डेक्स’ (आरएसआई) पनि ओभरसोल्ड क्षेत्रमा पुगेर पुनः माथितिर मोडिएको छ । हाल २९.६५ विन्दुमा रहेको आरएसआईले अत्यधिक बिक्री चापपछि बजारमा प्राविधिक सुधार (पुलब्याक) आउने सम्भावनालाई थप बलियो बनाएको छ ।
बजारको समग्र ट्रेन्ड मापन गर्ने ‘एभरेज डाइरेक्सनल इन्डेक्स’ (एडीएक्स) ३१.८८ मा रहनु र आरएसआई ओभरसोल्डबाट फर्किनुले तत्कालका लागि घट्दो क्रम रोकिएर बजार माथितिर जाने प्रयासमा रहेको विश्लेषण प्राविधिकहरूको छ । प्राविधिक संरचना अनुसार २५१३ देखि २५२० आसपासको क्षेत्रले बजारलाई अल्पकालीन रूपमा बलियो टेवा (सपोर्ट) दिएको छ । यदि यही सुधारको गतिले आज पनि निरन्तरता पाएमा बजारले पहिलो प्रतिरोध (रेजिस्टेन्स) २६७३.१४ विन्दुमा सामना गर्नुपर्ने देखिन्छ । उक्त विन्दु पार गर्न सकेमा क्रमशः २७५४ र २८०० विन्दुसम्मको यात्रा तय हुने आधारहरू चार्टमा कोरिएका छन् ।
बजार सूचकसँगै बुधबार कारोबार रकममा पनि सामान्य सुधार आएको थियो, जसले आजको बजारलाई थप ऊर्जा दिन सक्छ । मंगलबार २ अर्ब ९० करोडको सेयर किनबेच भएकोमा बुधबार कारोबार रकम बढेर २ अर्ब ९४ करोड २७ लाख रुपैयाँ पुगेको थियो । कुल ३५४ कम्पनीका सेयर खरिदबिक्री हुँदा विशेषगरी लघुवित्त र जलविद्युत् क्षेत्रका कम्पनीहरूमा लगानीकर्ताको उच्च आकर्षण देखिएको थियो । १३ मध्ये ११ वटा उपसमूहमा हरियाली छाउनु र तल्लो विन्दुबाट बजार सम्हालिनुले लगानीकर्ताको मनोविज्ञान सकारात्मक बन्दै गएको संकेत गर्छ । समग्रमा अत्यधिक बिक्री चापपछि बनेको बुलिस क्याण्डल र सूचकहरूमा देखिएको सकारात्मक मोडले आजको बजारले छिट्टै नयाँ लय समात्न सक्ने प्राविधिक संकेत गरेको छ ।
