काठमाडौं, ८ मंसिर । नेपालको रेमिट्यान्स उद्योगलाई अन्तर्राष्ट्रिय स्तरमा सुदृढ र विश्वासनीय बनाउने दिशामा एक महत्वपूर्ण कदम चाल्दै नेपाल रेमिटरर्स एशोसिएसन (एनआरए) ले मलेशियन एशोसिएसन अफ मनी सर्भिसेस बिजनेस (एमएएमएसबी) सँग औपचारिक रूपमा साझेदारी गरेको छ।

धेरै चरणका छलफल र परामर्शपछि सम्पन्न यो सहकार्यले दुवै देशका मनी सर्भिसेस व्यवसायलाई सुरक्षित, पारदर्शी, आधुनिक तथा अन्तर्राष्ट्रिय मापदण्डअनुरूप विकास गर्ने लक्ष्य लिएको छ। साझेदारी अन्तर्गत ज्ञान आदान–प्रदान, सीमा–पार सहकार्य, प्रविधि हस्तान्तरण तथा उद्योगका उत्तम अभ्यासहरूको साझा प्रयोगमार्फत दुवै मुलुकका वित्तीय सेवा प्रदायकहरू लाभान्वित हुनेछन्।

सम्झौता हस्ताक्षर समारोहमा एमएएमएसबीका अध्यक्ष दातो’ जाजाखान बिन कादेर गनी र एनआरएका अध्यक्ष रितेश मित्तलबीच नियामक अनुपालन सुधार, डिजिटल रूपान्तरणलाई गति दिने, अवैध सञ्चालकहरूको नियन्त्रण गर्ने तथा उपभोक्ता संरक्षणलाई सुदृढ बनाउने विषयमा व्यापक छलफल भएको थियो।

एनआरएका अध्यक्ष रितेश मित्तलले यस सहकार्यलाई “नेपालको रेमिट्यान्स उद्योगका लागि ऐतिहासिक उपलब्धि” भन्दै, यसले क्षेत्रीय सम्बन्ध मजबुत बनाउने, नवप्रवर्तनलाई प्रवर्द्धन गर्ने तथा दक्षता विकासमा महत्वपूर्ण योगदान गर्ने बताए। उनका अनुसार, यो साझेदारीले वैदेशिक रोजगारीमा रहेका लाखौँ नेपाली श्रमिक तथा नेपालको समग्र अर्थतन्त्रलाई प्रत्यक्ष लाभ पुर्‍याउनेछ।

त्यस्तै, एमएएमएसबीका अध्यक्ष दातो’ जाजाखान बिन कादेर गनीले नेपालसँगको सहकार्यप्रति खुशी व्यक्त गर्दै भने, “यो साझेदारीले प्रविधि, सीप विकास तथा अन्तर्राष्ट्रिय मापदण्डको पालना मार्फत मनी सर्भिसेस क्षेत्रलाई थप मजबुत बनाउने हाम्रो साझा प्रतिबद्धता झल्काउँछ।”

यस ऐतिहासिक सहकार्यले दुवै संस्थाबीच सीप विकास, नीतिगत संवाद, अनुसन्धान तथा क्षेत्रीय समन्वयका नयाँ मार्गहरू खोल्ने अपेक्षा गरिएको छ। साथै, यसले विश्वभरका वैदेशिक श्रमिक तथा उनीहरूका परिवारका लागि अझ सुरक्षित, छिटो र किफायती रेमिट्यान्स सेवाहरू उपलब्ध गराउने दिशामा महत्वपूर्ण प्रगति गर्नेछ।