सोलुखुम्बुमा निर्माण गरिएको दुधकुण्ड खोला जलविद्युत आयोजनामा स्थानीय बासिन्दाको लगानी भित्र्याउने उद्देश्यसहित Mount Everest Power Development Limited ले निष्काशन गरेको प्राथमिक सेयर (आईपीओ) मा आवेदन दिने समय आजबाट सकिँदैछ । कम्पनीले वैशाख १७ गतेदेखि आयोजना प्रभावित क्षेत्रका स्थानीय बासिन्दाका लागि सेयर बिक्री खुला गरेको थियो ।

कम्पनीले प्रतिकित्ता १०० रुपैयाँका दरले कुल ८ लाख ६० हजार कित्ता साधारण सेयर स्थानीयका लागि छुट्याएको हो । जलविद्युत आयोजनाले प्रत्यक्ष असर पारेका क्षेत्रका बासिन्दालाई प्राथमिकता दिँदै कम्पनीले पहिलो चरणमा स्थानीय तहबाटै पूँजी संकलन गर्ने रणनीति अपनाएको देखिन्छ ।

जारी गरिएको सेयरमध्ये ३ लाख ४४ हजार कित्ता सोलुदुधकुण्ड नगरपालिका वडा नम्बर १ र २ का अति प्रभावित क्षेत्रका बासिन्दाका लागि छुट्याइएको छ । बाँकी ५ लाख १६ हजार कित्ता भने आयोजनाबाट प्रभावित अन्य वडाका स्थानीय बासिन्दाले आवेदन दिन पाउने व्यवस्था गरिएको कम्पनीले जनाएको छ ।

स्थानीय लगानीकर्ताले न्यूनतम १० कित्तादेखि अधिकतम १० हजार कित्तासम्म आवेदन दिन सक्नेछन् । आवेदन प्रक्रिया बैंक तथा वित्तीय संस्थाका तोकिएका शाखा कार्यालय र नेपाल धितोपत्र बोर्डबाट अनुमति प्राप्त आस्वा सदस्य संस्थामार्फत खुला गरिएको छ ।

कम्पनीले कुल ८६ करोड रुपैयाँ जारी पूँजीमध्ये ३० प्रतिशत अर्थात २५ लाख ८० हजार कित्ता सेयर सर्वसाधारणका लागि निष्काशन गर्ने अनुमति पाएको छ । त्यसअन्तर्गत पहिलो चरणमा आयोजना प्रभावित स्थानीय बासिन्दाका लागि सेयर निष्काशन गरिएको हो ।

आईपीओ निष्काशन तथा बिक्री प्रबन्धकको जिम्मेवारी NIMB S Capital Limited ले सम्हालेको छ । यस्तै, केयर रेटिङ नेपालले कम्पनीलाई ‘केयर एनपी डबल बी प्लस’ इस्यूअर रेटिङ प्रदान गरेको छ । उक्त रेटिङले कम्पनीको वित्तीय अवस्था मध्यम जोखिमयुक्त रहेको संकेत गर्ने विश्लेषण गरिएको छ ।

माउन्ट एभरेष्ट पावरले सञ्चालन गरिरहेको १२ मेगावाट क्षमताको दुधकुण्ड खोला जलविद्युत आयोजनाको कुल लागत २ अर्ब ३६ करोड रुपैयाँभन्दा बढी रहेको कम्पनीले जनाएको छ । कम्पनीका अनुसार आयोजनाको साधारण लगानी फिर्ता अवधि ६.४ वर्ष रहेको छ भने डिस्काउन्ट गरिएको आधारमा लगानी फिर्ता हुन करिब ८.९४ वर्ष लाग्ने अनुमान गरिएको छ ।