काठमाडौं, २० कात्तिक। ग्लोबल आइएमई बैंकले काठमाडौंको उत्तरढोकामा अत्याधुनिक केन्द्रीय कार्यालय भवन निर्माण गर्ने भएको छ । करिब ३ अर्ब रुपैयाँको लागतमा निर्माण हुन लागेको भवनको बैंकका अध्यक्ष चन्द्रप्रसाद ढकालले धनतेरसको अवसर पारेर शिलान्यास तथा जग पूजा गरेका छन् ।

करिब १ लाख ४५ हजार वर्गफिट बिल्टअप क्षेत्रफलमा निर्माण हुने उक्त भवन तीन वर्षभित्र सम्पन्न गर्ने लक्ष्य बैंकले राखेको छ । भवनको संरचना निर्माणदेखि इन्टेरियरलगायत सम्पूर्ण कामका लागि करिब ३ अर्ब रुपैयाँ खर्च हुने अनुमान गरिएको बैंकले जनाएको छ ।

शिलान्यास कार्यक्रममा बैंकका अध्यक्ष ढकालले प्रस्तावित भवन वाणिज्य बैंकहरूमध्ये सबैभन्दा धेरै क्षेत्रफल भएको र साधनसम्पन्न केन्द्रीय कार्यालयमध्ये एक हुने विश्वास व्यक्त गरे । काठमाडौंको प्राइम लोकेसन उत्तरढोकामा निर्माण हुन लागेको भवन भविष्यमा एउटा आइकनिक भवनका रूपमा स्थापित हुने उनको भनाइ छ ।

ढकालले बैंकका ग्राहक, सेयरधनी, कर्मचारी तथा शुभेच्छुकहरूको साथ र सहयोगका कारण काठमाडौंको प्राइम क्षेत्रमा केन्द्रीय कार्यालय निर्माण गर्ने अवस्थामा पुगेको बताए । आगामी दिनमा पनि नियमनकारी निकाय, नेपाल सरकार, नेपाल राष्ट्र बैंक, आम नागरिक तथा ग्राहकबाट निरन्तर सहयोग प्राप्त हुने विश्वास उनले व्यक्त गरे ।

उनले भने, ‘ग्लोबल आइएमई बैंकको केन्द्रीय कार्यालयको आज शिलान्यास भएको छ । सम्भवतः वाणिज्य बैंकहरूको केन्द्रीय कार्यालयमध्ये सबैभन्दा धेरै क्षेत्रफल भएको र साधनसम्पन्न कार्यालय भवनको आज शिलान्यास भएको छ । करिब १ लाख ४५ हजार स्क्वायर फिटको बिल्टअप एरियामा यो कार्यालय निर्माण हुनेछ । यसको निर्माण कार्य करिब तीन वर्षमा सम्पन्न हुनेछ भने संरचनादेखि इन्टेरियरसम्मका सम्पूर्ण कामका लागि करिब ३ अर्ब रुपैयाँ लागत लाग्नेछ ।’

उनले बैंकप्रति ग्राहक, सेयरधनी, कर्मचारी र शुभेच्छुकहरूले देखाएको माया, साथ र सद्भावकै कारण केन्द्रीय कार्यालय निर्माणको काम अघि बढाउन सम्भव भएको उल्लेख गरे ।

त्यस्तै, बैंकका प्रमुख कार्यकारी अधिकृत (सीईओ) सुरेन्द्रराज रेग्मीले करिब ५९ लाख ग्राहकको माया, विश्वास र शुभेच्छाका कारण ग्लोबल आइएमई बैंक ठूलो बैंकका रूपमा स्थापित हुन सफल भएको बताए ।

उनले आफ्नै भवनबाट बैंकिङ सेवा सञ्चालन गर्ने उद्देश्यसहित नयाँ केन्द्रीय कार्यालय निर्माण थालिएको जानकारी दिए । हाल केन्द्रीय कार्यालयअन्तर्गतका विभिन्न विभाग एउटै भवनबाट सञ्चालन हुन नसकिरहेको अवस्थामा नयाँ भवन निर्माण सम्पन्न भएपछि सबै विभागलाई एउटै छानामुनिबाट सञ्चालन गर्न सकिने उनको भनाइ छ ।