काठमाडौं, २७ चैत । चालु आर्थिक वर्षको फागुन महिनामा नेपालमा वार्षिक बिन्दुगत उपभोक्ता मुद्रास्फीति ३.७५ प्रतिशत पुगेको छ, अघिल्लो वर्षको सोही महिनामा यस सूचकांक ४.८२ प्रतिशत थियो।

समीक्षा महिनामा खाद्य तथा पेय पदार्थ समूहको मुद्रास्फीति ३.३४ प्रतिशत र गैर–खाद्य तथा सेवा समूहको मुद्रास्फीति ३.९७ प्रतिशत रहेको छ। अघिल्लो वर्षको सोही अवधिमा यी समूहहरूको मुद्रास्फीति क्रमशः ५.९५ प्रतिशत र ४.०७ प्रतिशत थियो।

खाद्य र पेय पदार्थ समूहमा घ्यू तथा तेलको मूल्य १३.७४ प्रतिशतले वृद्धि भएको छ भने दाल र गेडागुडीको मूल्य ७.८० प्रतिशतले बढेको छ। फलफूल र गैर-मदिराजन्य पेय पदार्थको मूल्य पनि क्रमशः ६.८२ र ५.१५ प्रतिशतले बढेको छ। यद्यपि, तरकारी र माछा तथा मासु समूहको मूल्य क्रमशः १.२४ प्रतिशत र ०.७४ प्रतिशतले घटेको छ।

गैरखाद्य र सेवा समूहमा विविध वस्तु र सेवाहरूको मूल्य १०.१४ प्रतिशत, कपडा र जुत्ताचप्पलको ७.०१ प्रतिशत, मदिराजन्य पेय पदार्थको ६.०७ प्रतिशत र यातायातको ५.०७ प्रतिशतले वृद्धि भएको छ।

समीक्षा महिनामा देशभरका विभिन्न क्षेत्रहरूमा मुद्रास्फीति दरमा विभिन्नता देखिएको छ। काठमाडौं उपत्यकामा ३.२५ प्रतिशत, तराईमा ३.७७ प्रतिशत, पहाडमा ३.७२ प्रतिशत र हिमाल क्षेत्रमा ४.७७ प्रतिशत रहेको छ।