काठमाडौं, १६ असोज । मेनछेन एफसीले दाङजिन कप एकदिने फुटबल लिगको उपाधि जितेको छ । मनछेन एफसीले सुनसङ एफसीलाई पराजित गर्दै उपाधि कब्जा गरेको हो ।

दशैंका अवसरमा दक्षिण कोरियाको दाङजिन क्षेत्रमा बसोबास गर्ने नेपाली समुदायद्वारा स्थापित रइला गाइजको आयोजना सम्पन्न प्रतियोगितामा मेनछेन एफसीले सुनसङलाई २–१ गोलअन्तरले हराउँदै उपाधि जितेको हो । मेनछनका प्रनिल लामा र अमिर लिम्बुले गोल गरेका थिए । सुनसङबाट भीष्म लावतीले गोल फर्काएका थिए ।

प्रतियोगितामा सर्वाधिक गोलकर्ताका मदन खड्का, उत्कृष्ट गोलरक्षक हेमराज गुरुङ र उत्कृष्ट खेलाडी शिशिर लिम्बु चयन भएको प्रतियोगिता संयोजक राजराम थिङले जानकारी दिए । प्रतियोगिताको विजेताले १० लाख वन र उपविजेताले पाँच लाख वन नगद पुरस्कार प्राप्त गरे । पुरस्कार दाङजिन नेपाली समाजका अध्यक्ष भीष्म लावतीले विजयी खेलाडी पुरस्कार वितरण गरे ।