काठमाडौं — बैंकिङ कारोबार बिस्तारै डिजिटल माध्यमतर्फ सर्दै जाँदा भौतिक शाखाको आवश्यकता घट्न थालेको छ। यसैको असर देखिने गरी चालु आर्थिक वर्षको दश महिनामा देशका बैंक तथा वित्तीय संस्थाका १४९ शाखा बन्द भएका छन्। नेपाल राष्ट्र बैंकले ल्याएको शाखा समायोजन नीतिले यसलाई थप गति दिएको हो।

ठूला सहर र महानगरपालिकाभित्र एउटै बैंकका धेरै शाखा सञ्चालनमा रहेको अवस्थामा राष्ट्र बैंकले मौद्रिक नीति समीक्षामार्फत यस्ता शाखा गाभ्न अनुमति दिएको थियो। यही व्यवस्थाअनुसार काठमाडौं, ललितपुर, पोखरालगायत छवटा महानगरपालिकामा रहेका १० वटा बैंकका झन्डै सवा सय शाखा एकीकरण भइसकेका छन्।

समायोजनको सूचीमा एनआईसी एसिया बैंक सबैभन्दा माथि छ, जसले एक्लैले ४४ शाखा गाभेको छ। कुमारी, नेपाल इन्भेस्टमेन्ट मेगा र प्रभु बैंकले पनि क्रमशः २४, १८ र १२ शाखा घटाएका छन् भने विकास बैंकमध्ये महालक्ष्मीले ४ शाखा एकीकरण गरेको छ।

यसको परिणामस्वरूप वर्षको सुरुमा पाँच हजार नाघेको वाणिज्य बैंकका शाखा संख्या अहिले घटेर ४,९६३ मा झरेको छ। विकास बैंकका शाखा पनि घटेका छन् भने फाइनान्स कम्पनीका शाखामा भने सामान्य वृद्धि देखिएको छ। विश्लेषकहरूका अनुसार सञ्चालन खर्च घटाउने र सेवालाई थप चुस्त बनाउने उद्देश्यले यो प्रवृत्ति आगामी दिनमा पनि जारी रहनेछ।