काठमाडौं — लगातार तीन दिनको तीव्र वृद्धिपछि बुधबार केही थामिएको सेयर बजार बिहीबार पुनः सकारात्मक लयमा फर्किएसँगै आज (शुक्रबार) को कारोबारप्रति लगानीकर्ताहरू उत्साहित देखिएका छन् । अघिल्लो दिन २१.१९ अंकको करेक्सन व्यहोरेको नेप्से परिसूचक बिहीबार ११.९३ अंकले उकालो लागेर २ हजार ६ सय २४ दशमलव ३६ विन्दुमा बन्द भएको थियो । सरकारले पुँजी बजार सुदृढीकरण र पुनरुत्थानका लागि ल्याएको २१ बुँदे कार्ययोजनाको सकारात्मक प्रभाव तथा सूचीकृत कम्पनीहरूले धमाधम घोषणा गरिरहेको आकर्षक लाभांशका कारण बजारमा लगानीकर्ताको मनोबल उकासिएको छ ।

बजार परिसूचकसँगै कारोबार रकममा पनि स्थिरता कायम रहनाले बजार घट्दा तल्लो विन्दुमा सेयर खरिद गर्ने (बाइ अन डिप्स) प्रवृत्ति हावी भएको सङ्केत गर्छ । बिहीबार ३ सय ३९ कम्पनीका १ करोड ३६ लाख कित्ता सेयर रु. ५ अर्ब ४९ करोड बराबरमा किनबेच भएका छन् । नयाँ पुँजीको ठूलो प्रवेशभन्दा पनि विद्यमान लगानीकर्ताहरूबीच नै पुँजीको स्थानान्तरण भइरहेको देखिए पनि साढे ५ अर्बको कारोबार रकमले तरलता बलियो रहेको पुष्टि गर्छ । हालै २० प्रतिशत लाभांश घोषणा गरेको सिद्धार्थ बैंकमा लगानीकर्ताको सबैभन्दा उच्च आकर्षण देखिँदा एकैदिन रु. ३३ करोड ६२ लाखको कारोबार भएको छ भने शिवम् सिमेन्ट्स र सोलु हाइड्रोपावरमा पनि उल्लेख्य खरिद-बिक्री भएको छ ।

प्राविधिक दृष्टिकोणबाट हेर्दा बिहीबारको कारोबारले स्पष्ट हरियो ‘बुलिश क्यान्डल’ निर्माण गरेको छ । क्यान्डलको तल्लो भागमा धेरै सानो ‘लो’ (२,६१५.६९) मात्र बन्नुले २,६१५ देखि २,६०२ को क्षेत्रमा खरिदकर्ताहरू निकै सक्रिय रहेको र लगानीकर्ताहरू आत्तिएर सेयर बेच्ने (प्यानिक सेलिङ) मनस्थितिबाट बाहिरिएको स्पष्ट हुन्छ । साथै, दैनिक आरएसआई (RSI) ५५.८१ विन्दुमा पुग्नु र म्याकडी (MACD) सूचकमा हिस्टोग्राम धनात्मक क्षेत्रमा (+११.७२) पुगी हरियो बन्नुले बजारमा बिक्री चाप समाप्त भई खरिद चाप निरन्तर बलियो भइरहेको देखाउँछ ।

बजारको संरचनात्मक विश्लेषण अनुसार २,५०० विन्दुको तल्लो तहबाट नेप्सेले ‘चेन्ज अफ क्यारेक्टर’ (CHoCH) बनाएर उकालो यात्रा तय गरिसकेको छ । आजको कारोबारमा बजारले २,६७० देखि २,६८० को मुख्य प्रतिरोध (रेसिस्टेन्स) क्षेत्र परीक्षण गर्नेछ । यदि यो विन्दुलाई तोडेर बजार माथि गएमा नेप्सेका लागि २,७५४ हुँदै २,८०० सम्मको नयाँ लक्ष्य खुल्नेछ । यद्यपि, बजारमा सामान्य गिरावट आएमा २,६०२ को विन्दुले पहिलो बलियो सपोर्टको काम गर्नेछ । समग्रमा सकारात्मक माहौल रहे पनि छोटो अवधिको नाफा सुरक्षित गर्ने (प्रोफिट बुकिङ) रणनीतिमा लगानीकर्ता चनाखो रहेकाले आज बजारमा सामान्य उतारचढाव भने देखिन सक्छ ।