हिम पर्वत हाइड्रोपावरले कात्तिक ११ गतेदेखि आईपीओ निष्कासन गर्दै
वि.सं.२०८३ असोज २६ सोमवार ०९:३५
494
shares
shares
काठमाडौं — हिम पर्वत हाइड्रोपावर लिमिटेडले आगामी कात्तिक ११ गतेदेखि दोलखाका आयोजना प्रभावित स्थानीय बासिन्दा र वैदेशिक रोजगारीमा रहेका नेपाली श्रमिकका लागि प्राथमिक सेयर (आईपीओ) निष्कासन गर्ने भएको छ।
कम्पनीले आफ्नो १ अर्ब ५९ करोड रुपैयाँ बराबरको जारी पुँजीमध्ये ३५ प्रतिशत अर्थात् ५९ लाख १५ हजार कित्ता सेयर सर्वसाधारणका लागि जारी गर्न लागेको हो। यसमध्ये १० प्रतिशतले हुन आउने १६ करोड ९० लाख रुपैयाँ बराबरको १६ लाख ९० हजार कित्ता सेयर आयोजना प्रभावित दोलखाली नागरिकलाई वितरण गरिनेछ। त्यसैगरी, सर्वसाधारणको हिस्सामा पर्ने सेयरमध्येबाट ४ लाख २२ हजार ५ सय कित्ता सेयर भने श्रम स्वीकृति लिएर वैदेशिक रोजगारीमा गएका नेपालीलाई छुट्याइएको छ।
सेयर खरिद गर्न चाहने स्थानीयले कात्तिक ११ देखि छिटोमा कात्तिक २५ गतेसम्म र मागबमोजिम आवेदन नपरेमा ढिलोमा मंसिर १० गतेसम्म आवेदन दिन पाउनेछन्। वैदेशिक रोजगारीमा रहेकाहरूका लागि भने कात्तिक १६ गतेसम्मको समयसीमा तोकिएको छ, जुन आवश्यकताअनुसार कात्तिक २५ गतेसम्म लम्बिन सक्छ। दुवै समूहका लगानीकर्ताले न्यूनतम १० कित्तादेखि अधिकतम १० हजार कित्तासम्म माग गर्दै आवेदन दिन सक्नेछन्।
आईपीओ निष्कासन तथा बिक्री प्रबन्धकको जिम्मा सिटिजन्स क्यापिटल लिमिटेडलाई दिइएको छ। कम्पनीको वित्तीय अवस्था र कर्जा तिर्न सक्ने क्षमतालाई लिएर इक्रा नेपालले ‘बीबी प्लस’ रेटिङ दिएको छ, जसले वित्तीय दायित्व पूरा गर्ने सम्बन्धमा मध्यम जोखिम रहेको संकेत गर्छ।
सन् २०१४ मा स्थापना भएको यस कम्पनीले दोलखामा ५.५ मेगावाटको सागु खोला-१ र २० मेगावाटको सागु खोला गरी कुल २५.५ मेगावाट क्षमताका दुईवटा जलविद्युत् आयोजना सञ्चालन गरिरहेको छ। करिब ४ अर्ब ९४ करोड रुपैयाँ लागतमा निर्माण सम्पन्न यी आयोजनामा ६६ प्रतिशत ऋण र ३४ प्रतिशत स्वपुँजी (इक्विटी) को हिस्सा रहेको छ। आयोजनाहरूले सन् २०२५ देखि नै सफलतापूर्वक विद्युत् उत्पादन गरिरहेका छन्।
