काठमाडौं, २९ असोज। राजमार्गमा यात्रा गर्ने यात्रुलाई स्वच्छ र गुणस्तरीय खाना उपलब्ध गराउने उद्देश्यले सरकारले सडक छेउका होटल तथा रेस्टुरेन्टको स्तरीकरण गरेको छ। मुग्लिन, दासढुङ्गा, जुगेडी र रामनगर क्षेत्रका १७ वटा होटल तथा रेस्टुरेन्टको अनुगमन गर्दा मुग्लिनस्थित ‘दाल भात पावर’ मात्रै ‘अति उत्तम’ वर्गमा परेको छ।

खाद्य प्रविधि तथा गुण नियन्त्रण विभागले सार्वजनिक गरेको विवरणअनुसार ‘दाल भात पावर’ले तीन तारासहितको हरियो स्टिकर प्राप्त गरेको हो। अनुगमन गरिएका अन्य होटलमध्ये अधिकांश अर्थात् १० वटा सामान्य श्रेणीमा परेका छन्।

१० होटल सामान्य श्रेणीमा

विभागले होटल तथा रेस्टुरेन्टको खाद्य स्वच्छता, भान्साको अवस्था, व्यक्तिगत सरसफाइ र खाद्य पदार्थको भण्डारणलाई आधार मानेर स्तरीकरण गरेको हो। सोही मूल्यांकनका आधारमा होटलहरूलाई चार तहमा वर्गीकरण गरी स्टिकर वितरण गरिएको छ।

राजमार्गका होटलमा सरसफाइको कमी, बासी खाना, खानामा झिँगा भन्किने र उपभोक्ताबाट चर्को मूल्य असुल्ने गरिएको गुनासो बढेपछि अनुगमन गरिएको हो।

तीन सरकारी निकायको समन्वयमा अनुगमन

भौतिक पूर्वाधार तथा यातायात मन्त्रालय र यातायात व्यवस्था विभागको समन्वयमा खाद्य प्रविधि तथा गुण नियन्त्रण कार्यालय हेटौँडा र डिभिजन कार्यालय चितवनको संयुक्त टोलीले स्थलगत निरीक्षण गरेको थियो।

राजमार्गमा सार्वजनिक यात्रुवाहक सवारीसाधन रोकिने होटल तथा रेस्टुरेन्टमा यात्रुले स्वच्छ र सुरक्षित खाना पाउनुपर्ने भन्दै अनुगमनलाई प्राथमिकता दिइएको हो।

यात्रुको स्वास्थ्य र मूल्यमा निगरानी आवश्यक

लामो दूरीको यात्रामा राजमार्गका होटल तथा रेस्टुरेन्ट यात्रुका लागि खाना खाने प्रमुख गन्तव्य हुन्। त्यस्ता स्थानमा खाद्य स्वच्छता कायम नहुँदा यात्रुको स्वास्थ्यमा असर पर्न सक्छ भने चर्को मूल्यले उपभोक्ता थप मारमा पर्ने गरेका छन्।

होटलको स्तरीकरणले यात्रुलाई खाना खान उपयुक्त स्थान छनोट गर्न सहज हुने अपेक्षा गरिएको छ। तर, स्टिकर वितरणमा मात्र सीमित नभई होटलले मापदण्ड पालना गरे–नगरेको नियमित अनुगमन गर्नुपर्ने आवश्यकता पनि देखिन्छ।

सम्बन्धित निकायले अनुगमनलाई निरन्तरता दिँदै खाद्य स्वच्छता कायम नगर्ने र उपभोक्तालाई अनुचित मूल्यमा सेवा दिने व्यवसायीमाथि आवश्यक कारबाही गर्न सके राजमार्गको खाना तथा खाजा सेवामा सुधार आउने अपेक्षा गर्न सकिन्छ।