काठमाडौं,११ कार्तिक। भारतको आन्ध्र प्रदेशको तटीय क्षेत्रमा चक्रवात ‘अर्णव’ प्रवेश गरेसँगै नेपालमा पनि यसको अप्रत्यक्ष प्रभाव पर्ने भएको छ। मौसममा आउने परिवर्तनका कारण बिहीबार रातिदेखि देशका विभिन्न भागमा वर्षा, हावाहुरी र उच्च हिमाली क्षेत्रमा हिमपातको सम्भावना रहेको छ।

भारतको आन्ध्र प्रदेशमा चक्रवातका कारण भारी वर्षा र तीव्र हावाहुरी चलिरहेको छ। त्यहाँका जोखिमयुक्त तटीय क्षेत्रमा सर्वसाधारणलाई सुरक्षित स्थानमा सारिएको छ भने केही जिल्लामा विद्यालयसमेत बन्द गरिएका छन्। भारतीय मौसम अधिकारीहरूले हावाको गति प्रतिघण्टा १५० किलोमिटरसम्म पुग्न सक्ने चेतावनी दिएका छन्।

नेपालको मौसममा भने बंगालको खाडीमा विकसित चक्रवातसँग सम्बन्धित मौसमी प्रणालीका कारण परिवर्तन आउने मौसम पूर्वानुमान महाशाखाले जनाएको छ। यसको प्रभाव विशेषगरी शुक्रबार र शनिबार बढी देखिन सक्ने अनुमान गरिएको छ।

पाँच प्रदेशमा वर्षाको सम्भावना

मौसम पूर्वानुमानअनुसार कोशी, मधेश, बागमती, गण्डकी र लुम्बिनी प्रदेशका विभिन्न स्थानमा वर्षा हुन सक्नेछ। केही स्थानमा मेघगर्जन, चट्याङ र तीव्र हावासहित मध्यमदेखि भारी वर्षाको सम्भावना छ।

कर्णाली र सुदूरपश्चिम प्रदेशका केही स्थानमा पनि वर्षा हुन सक्ने अनुमान गरिएको छ। वर्षाका कारण बाढी, पहिरो, सडक अवरोध तथा हवाई यातायातमा समस्या आउन सक्ने भन्दै सम्बन्धित निकायले सतर्कता अपनाउन आग्रह गरेका छन्।

हिमाली क्षेत्रमा हिमपात र हिमपहिरोको जोखिम

चक्रवातको प्रभावका कारण उच्च पहाडी तथा हिमाली क्षेत्रमा भारी हिमपात, हिमआँधी र हिमपहिरोको जोखिम बढ्न सक्ने चेतावनी दिइएको छ। यसले पदयात्रा, पर्वतारोहण तथा दुर्गम क्षेत्रको आवागमन जोखिमपूर्ण बनाउन सक्छ।

सम्भावित जोखिमलाई ध्यानमा राख्दै अध्यागमन विभागले असोज २९ देखि ३१ गतेसम्म उच्च जोखिमयुक्त हिमाली क्षेत्रमा पदयात्राका लागि नयाँ अनुमति जारी गर्ने कार्य स्थगित गरेको छ। जोखिमयुक्त क्षेत्रमा रहेका पर्यटक तथा पदयात्रीलाई मौसम अनुकूल नहुँदासम्म सुरक्षित स्थानमा रहन आग्रह गरिएको छ।

अनावश्यक यात्रा नगर्न आग्रह

राष्ट्रिय विपद् जोखिम न्यूनीकरण तथा व्यवस्थापन प्राधिकरणले प्रतिकूल मौसमको सम्भावनालाई ध्यानमा राख्दै सर्वसाधारणलाई सतर्क रहन आग्रह गरेको छ। विशेषगरी नदीकिनार, बाढी तथा पहिरोको जोखिम भएका क्षेत्र र उच्च हिमाली गन्तव्यमा अनावश्यक यात्रा नगर्न सुझाव दिइएको छ।

किसानलाई पाकेको धानबाली सुरक्षित रूपमा भित्र्याउन तथा यात्रामा निस्कनुअघि मौसमको पछिल्लो अवस्था बुझ्न पनि आग्रह गरिएको छ।

सम्बन्धित निकायले मौसम पूर्वानुमान र आधिकारिक सूचनाको नियमित जानकारी लिन तथा जोखिमको संकेत देखिएमा सुरक्षित स्थानमा जान आग्रह गरेका छन्।