काठमाडौं, ७ फागुन । बुधवार फागुन ७ गते देशभर प्रजातन्त्र दिवस मनाइँदै छ। प्रजातन्त्र दिवस नेपालका लागि एक ऐतिहासिक र महत्त्वपूर्ण अवसर हो। २००७ सालमा प्रजातन्त्रको स्थापना भएको यादमा यो दिन हरेक वर्ष मनाइन्छ। २००७ सालको जनआन्दोलन र राजनीतिक समझदारीका आधारमा राणा शासनको अन्त्य भएको थियो, जसले नागरिक अधिकार, बहुदलीय व्यवस्था र संवैधानिक शासनको स्थापना सम्भव बनायो।

आजको दिन राजधानी काठमाडौंसहित देशभर विभिन्न सांस्कृतिक, सामाजिक र सरकारी कार्यक्रमहरूको आयोजना गरिन्छ। विशेष गरी सैनिक मञ्च टुँडिखेलमा आयोजना हुने समारोह प्रजातन्त्रको सम्मानमा महत्वपूर्ण मानिन्छ।

नेपाल सरकारले प्रजातन्त्र दिवसको अवसरमा सार्वजनिक विदा घोषणा गरेको छ। जसका कारण सरकारी कार्यालयहरू, शिक्षण संस्थाहरू, बैंक र वित्तीय संस्थाहरू, साथै नेप्से बन्द रहनेछन्। यो दिन देशभर प्रजातन्त्रको महत्त्व र नागरिक अधिकारहरूको संरक्षणको पक्षमा चिन्तन गर्ने अवसरका रूपमा मनाइन्छ।