काठमाडौं,१३ कार्तिक। भिजन लुम्बिनी ऊर्जा कम्पनी लिमिटेडको लाभांश प्राप्त गर्न तथा वार्षिक साधारण सभामा सहभागी हुन चाहने सेयरधनीका लागि आज (कात्तिक १३ गते) अन्तिम दिन रहेको छ ।

कम्पनीले साधारण सभा तथा लाभांश वितरण प्रयोजनार्थ आगामी कात्तिक १६ गते सोमबार एक दिनका लागि सेयर दाखिला खारेज (बुक क्लोज) गर्ने निर्णय गरेको छ ।

यससँगै आजसम्म नेपाल स्टक एक्सचेन्ज (नेप्से) मा कारोबार भई कायम रहने सेयरधनीले कम्पनीको साधारण सभामा सहभागी हुन र प्रस्तावित लाभांश प्राप्त गर्न सक्नेछन् ।

कम्पनीले आगामी मंसिर ३ गते बिहीबार रुपन्देहीको बुटवल उपमहानगरपालिकास्थित दियालो फुडल्याण्ड कालिकानगर प्रा.लि.मा आठौँ वार्षिक साधारण सभा आह्वान गरेको छ । सभा बिहान ९ बजे सुरु हुनेछ ।

साधारण सभामा कम्पनीले हाल कायम चुक्ता पुँजीको ३.६८४२ प्रतिशत नगद लाभांश (करसहित) वितरण गर्ने प्रस्ताव पेस गर्नेछ ।

त्यसैगरी, सभाले लेखापरीक्षक नियुक्त गर्ने, गत आर्थिक वर्षको वित्तीय विवरण स्वीकृत गर्ने लगायतका प्रस्तावहरूमाथि छलफल गरी पारित गर्नेछ ।