काठमाडौं । युनाइटेड मोदी हाइड्रोपावर लिमिटेडले कम्पनीको सञ्चालक तथा व्यवस्थापन संरचनामा परिवर्तन भएको जानकारी नेपाल स्टक एक्सचेञ्ज (नेप्से) लाई गराएको छ ।

कम्पनीको २०८३ जेठ १० गते बसेको सञ्चालक समितिको बैठकले तत्कालीन प्रबन्ध निर्देशक रोमन दंगाल र सञ्चालक रेनुका पाण्डेको कार्यकाल समाप्त भएको निर्णय गरेको हो ।

त्यस्तै, कम्पनीको २०८३ वैशाख २७ गते सम्पन्न बाह्रौँ वार्षिक साधारण सभाबाट रेनुका पाण्डे र प्राप्ति अधिकारी सर्वसम्मत रूपमा सञ्चालक पदमा निर्वाचित भएको कम्पनीले जनाएको छ । सोही व्यवस्थाअनुसार तत्कालीन प्रबन्ध निर्देशक रोमन दंगाल अब कम्पनीको सञ्चालक नरहेको पनि स्पष्ट गरिएको छ ।

प्रबन्ध निर्देशक पद रिक्त भएको अवस्थामा अर्को व्यवस्था नभएसम्म कम्पनीको सम्पूर्ण व्यवस्थापकीय तथा कार्यकारी जिम्मेवारी अध्यक्ष नवीन सिलवालमा निहित रहने निर्णय गरिएको कम्पनीले जानकारी दिएको छ ।

कम्पनीले उक्त निर्णय औपचारिक रूपमा नेप्सेमा पठाउँदै आवश्यक जानकारी अद्यावधिक गराएको छ ।