लगातार तीन दिनको करेक्सनपछि नेप्से परिसूचकमा बिहीबार सामान्य ‘ब्रेक’ लागे पनि बजारले अझै आफ्नो स्पष्ट बाटो तय गर्न सकेको छैन। २६ सय विन्दुको मनोवैज्ञानिक रेखा आसपास चलिरहेको तीव्र घम्साघम्सीले लगानीकर्ताहरू आगामी दिशालाई लिएर ‘पर्ख र हेर’ को रणनीतिमा पुगेका छन्। परिसूचक २५ सय ९९ दशमलव १५ विन्दुमा अडेर बन्द हुँदा लगानीकर्ताको मुख्य चासो अब एउटै छ– बजारले यहाँबाट लय समात्ला वा थप ओरालो लाग्ला ?

प्राविधिक दृष्टिकोणबाट विश्लेषण गर्दा बिहीबारको दैनिक  चार्टमा बनेको ‘डोजी’ वा ‘स्पिनिङ टप’ क्यान्डलले बजारको अनिर्णयलाई छर्लङ्ग पारेको छ। सानो ‘रियल बडी’ र दुवैतर्फ बराबर जस्तै छाँया (स्याडो) हुनुले खरिदकर्ता र बिक्रीकर्ता दुवै पक्ष उत्तिकै हावी हुन खोजेको देखाउँछ। बजार २६०५ सम्म पुग्दा नाफा बुक गर्नेहरू सक्रिय हुने र २५८९ सम्म झर्दा सस्तोमा सेयर उठाउनेहरू अघि सर्ने प्रवृत्तिले बजार अहिले एउटा साँघुरो दायरा (कन्सोलिडेसन जोन) भित्र खुम्चिएको प्राविधिक विश्लेषकहरूको बुझाइ छ। यस्तो अनिर्णित क्यान्डल बन्दा बजारले जुनसुकै बेला एउटा ‘ब्रेकआउट’ (माथिल्लो यात्रा) वा ‘ब्रेकडाउन’ (तल्लो यात्रा) को दिशा लिन सक्ने सम्भावना बलियो रहन्छ।

बजारको मोमेन्टम नाप्ने प्राविधिक सूचकहरूले पनि तत्काल ठूलो उछालको संकेत गरिसकेका छैनन्। १४ दिने सापेक्षिक शक्ति सूचकांक (आरएसआई) ४८.१४ को विन्दुमा छ, जसले बजार पूर्ण रूपमा तटस्थ अर्थात् न त अति–खरिद  न त अति–बिक्री को अवस्थामा रहेको देखाउँछ। त्यसैगरी, ‘एमएसीडी’ लाइन अझै पनि सिग्नल लाइनभन्दा माथि र हिस्टोग्राम धनात्मक क्षेत्रमै रहे पनि हिस्टोग्रामका बारहरू क्रमिक रूपमा छोटा बन्दै गएका छन्। यसले बजारको पछिल्लो बुलिस (बढ्दो) गति केही सुस्त हुँदै गएको र बजारले नयाँ उचाइ तय गर्नुअघि शक्ति सञ्चय गरिरहेको संकेत गर्छ।

अब बजार कता जाला भन्ने प्रश्नको उत्तर प्राविधिक चार्टमा कोरिएका ट्रेन्डलाइन र पिभोट बिन्दुहरूले तय गर्नेछन्। प्राविधिक विश्लेषण अनुसार, यदि बजारमा बिक्रीचाप बढेर ओरालो लागेमा नेप्सेले २५४६  को विन्दुमा बलियो टेवा (सपोर्ट) पाउने देखिन्छ। यो विन्दु पनि भत्किएमा परिसूचक २५०१  को दोस्रो मुख्य टेवा क्षेत्रसम्म झर्न सक्ने जोखिम रहन्छ। तर, बजारले वर्तमान स्थितिलाई शक्ति सञ्चयको रूपमा प्रयोग गरी उकालो लागेमा भने घट्दो ट्रेन्डलाइनले बनाएको २६७६ को पहिलो र बलियो अवरोध पार गर्नुपर्ने चुनौती छ। यो विन्दुलाई सफलताका साथ पार गरेमा बजारको आगामी लक्ष्य क्रमशः २७५४ र २८०० को विन्दु हुनेछ।

सूचक स्थिर जस्तै रहे पनि बिहीबार करिब पौने ५ अर्ब (४ अर्ब ८९ करोड) रुपैयाँको सेयर किनबेच हुनुले बजारमा तरलता र खरिदबिक्रीको भोक भने कायमै रहेको पुष्टि गर्छ। समग्रमा भन्नुपर्दा, नेप्से अहिले निर्णायक मोडमा उभिएको छ। बजारले स्पष्ट दिशा समात्न २५४६ को टेवालाई जोगाएर २६७६ को अवरोधलाई भत्काउनु पर्ने प्राविधिक आवश्यकता छ। आगामी साताका सुरुवाती कारोबार दिनले नै बजार यो ‘कन्सोलिडेसन जोन’ बाट माथि उक्लन्छ वा पुनः करेक्सनमा जान्छ भन्ने यकिन गर्नेछ।