लुम्बिनी विकास बैंकको ६० हजार कित्ताभन्दा बढी संस्थापक सेयर बिक्रीमा
वि.सं.२०८३ असोज २७ मंगलवार १०:१४
455
shares
shares
लुम्बिनी विकास बैंक लिमिटेडका एक संस्थापक सेयरधनीले आफ्नो स्वामित्वमा रहेको ६० हजारभन्दा बढी संस्थापक सेयर बिक्रीमा राखेका छन्। बैंकका संस्थापक सेयरधनी किशोर राज पाण्डेले आफ्नो नाममा कायम रहेको कुल ६० हजार ७ सय ९ कित्ता सेयर बेच्नका लागि बैंकको सञ्चालक समिति समक्ष निवेदन दिएका हुन्।
नेपाल राष्ट्र बैंकको प्रावधानअनुसार यसरी बिक्रीमा राखिएको सेयर खरिद गर्ने पहिलो हक बैंकका हालका संस्थापक सेयरधनीहरूलाई नै हुनेछ। तसर्थ, उक्त सेयर खरिद गर्न इच्छुक विद्यमान संस्थापकहरूले सूचना प्रकाशित भएको मिति (असोज २७ गते) ले ३५ दिनभित्र बैंकको मुख्य कार्यालय डिल्लीबजार, काठमाडौंमा पुग्ने गरी खरिद गर्न चाहेको विवरण खुलाएर लिखित निवेदन पेस गर्नुपर्नेछ।
यदि तोकिएको ३५ दिने म्यादभित्र विद्यमान संस्थापकहरूबाट सेयर खरिदका लागि कुनै पनि लिखित जानकारी प्राप्त नभएमा भने उक्त सेयर अन्य व्यक्ति वा संस्थालाई बिक्री गर्ने बाटो खुल्नेछ। बैंकका अनुसार, संस्थापकहरूबाट आवेदन नपरेको खण्डमा बैंक तथा वित्तीय संस्था सम्बन्धी ऐन, २०७३ र नेपाल राष्ट्र बैंकको एकीकृत निर्देशनबमोजिम अन्य लगानीकर्तालाई सेयर बिक्री गर्ने प्रक्रिया अगाडि बढाइनेछ।
