दीर्घकालीन लगानीको स्रोत जुटाउने र वित्तीय अवस्थालाई थप सन्तुलित बनाउने उद्देश्यसहित नबिल बैंक लिमिटेडले ४ अर्ब रुपैयाँ बराबरको ऋणपत्र (डिबेन्चर) बजारमा ल्याउने तयारी गरेको छ। यस निष्कासनका लागि बैंकले गत असोज २८ गते नै नियामक निकाय नेपाल धितोपत्र बोर्ड (सेबोन) मा अनुमतिका लागि औपचारिक निवेदन पेस गरिसकेको छ।

बोर्डबाट स्वीकृति प्राप्त भएपछि बैंकले प्रतिइकाइ एक हजार रुपैयाँ अंकित मूल्यका कुल ४० लाख कित्ता ऋणपत्र जारी गर्नेछ। १० वर्षको परिपक्व अवधि (म्याचुरिटी पिरियड) रहेको यस ऋणपत्रमा लगानी गर्ने लगानीकर्ताले वार्षिक ५.५ प्रतिशतका दरले निश्चित ब्याजदर प्राप्त गर्नेछन्। नियामकको ऋणपत्र पाइपलाइन सूचीले पनि पछिल्लो समय बैंकहरूले पुँजी व्यवस्थापनका लागि डिबेन्चरलाई मुख्य औजार बनाउँदै लगेको देखाउँछ।

बैंकले निष्कासन गर्न लागेको कुल ४ अर्ब रुपैयाँमध्ये ठूला तथा संस्थागत लगानीकर्ता र सर्वसाधारणका लागि छुट्टाछुट्टै हिस्सा तय गरिएको छ। जसअनुसार ६० प्रतिशत अर्थात् २ अर्ब ४० करोड रुपैयाँ बराबरको २४ लाख कित्ता ऋणपत्र ‘प्राइभेट प्लेसमेन्ट’ (व्यक्तिगत तवर) मार्फत बिक्री गरिनेछ। बाँकी ४० प्रतिशत अर्थात् १ अर्ब ६० करोड रुपैयाँ बराबरको १६ लाख कित्ता ऋणपत्र भने सर्वसाधारणका लागि सार्वजनिक निष्कासन (पब्लिक इस्यु) मार्फत खुला गरिने बैंकले प्रस्ट पारेको छ।

यस ऋणपत्रको सम्पूर्ण निष्कासन तथा बिक्री प्रबन्धक (इस्यु म्यानेजर) को जिम्मेवारी ग्लोबल आइएमई क्यापिटल लिमिटेडलाई दिइएको छ। धितोपत्र बोर्डले आवश्यक अध्ययन पूरा गरी अन्तिम स्वीकृति दिएलगत्तै क्यापिटलले सर्वसाधारण र व्यक्तिगत तवरका लागि ऋणपत्रको बिक्री प्रक्रिया अघि बढाउनेछ।