काठमाडौं, १९ कात्तिक । तिहार तथा धनतेरसलाई लक्षित गर्दै नेपाल राष्ट्र बैंकले सुनको असर्फी र चाँदीका सिक्का बिक्री सुरु गरेसँगै बबरमहलस्थित टक्सार महाशाखामा खरिदकर्ताको भीड लागेको छ। सिक्का खरिद गर्न चाहने सर्वसाधारण बिहानैदेखि लामबद्ध भएका छन्।
नेपाल राष्ट्र बैंकले कात्तिक १९ र २० गते दुई दिन सुनका असर्फी तथा चाँदीका मेडालियन बिक्री गर्ने व्यवस्था मिलाएको हो। बबरमहलस्थित टक्सार महाशाखाबाट बिहान ११ बजेदेखि दिउँसो ३ बजेसम्म सिक्का बिक्री गरिँदैछ। मौज्दात रहेसम्म लाइनमा बसेका सेवाग्राहीलाई प्राथमिकताका आधारमा बिक्री गरिने राष्ट्र बैंकले जनाएको छ।

यस वर्ष राष्ट्र बैंकले २.५ ग्राम तौलको सुनको असर्फी र १० ग्रामका चाँदीका मेडालियन बिक्रीमा राखेको छ। चाँदीका सिक्कामा लक्ष्मी, गजलक्ष्मी र गणेशका आकृति अंकित छन्। राष्ट्र बैंकका कार्यकारी निर्देशक अनुज दाहालका अनुसार यस वर्ष असर्फी उत्पादनका लागि वाणिज्य बैंकहरूबाट ३५ किलो सुन खरिद गरिएको छ। सुनको अभावका कारण अघिल्ला दुई वर्ष सुनका असर्फी बिक्री गर्न नसकिएको राष्ट्र बैंकले जनाएको छ। गत वर्ष भने चाँदीका मेडालियन मात्रै बिक्री गरिएको थियो।

यसपटक सुनका असर्फीसमेत बिक्रीमा राखिएपछि खरिदकर्ताको आकर्षण बढेको छ। तिहारमा सुन तथा चाँदीका सिक्का खरिद गरी धनकी देवी लक्ष्मीको प्रतीकका रूपमा पूजा गर्दा शुभ हुने धार्मिक तथा सांस्कृतिक विश्वासका कारण पनि यस्ता सिक्काको माग बढ्ने गरेको छ।
राष्ट्र बैंकले बिक्री गर्ने असर्फी तथा मेडालियनको मूल्य बिक्रीकै दिनको सुनचाँदीको बजार मूल्यका आधारमा निर्धारण गर्ने व्यवस्था गरेको छ। सिक्का उत्पादन तथा प्रशोधनमा लागेको खर्चसमेत जोडिने भएकाले बजारमा प्रचलित सुनचाँदीको मूल्यभन्दा केही महँगो पर्न सक्ने राष्ट्र बैंकले स्पष्ट पारेको छ।

सिक्का खरिद गर्न चाहनेले नेपाली नागरिकता, राष्ट्रिय परिचयपत्र वा नम्बर खुलेको अन्य प्रमाणपत्रको प्रतिलिपिसहित स्वयं उपस्थित हुनुपर्नेछ। खरिदकर्ताले नगद वा क्यूआरमार्फत भुक्तानी गर्न सक्ने व्यवस्था गरिएको छ।

राष्ट्र बैंकको बिक्री व्यवस्थाअनुसार एक व्यक्तिले २.५ ग्रामको एउटा सुनको असर्फी खरिद गर्न पाउनेछन्। चाँदीका मेडालियनको खरिद सीमा भने राष्ट्र बैंकको जारी सूचनाअनुसार लागू हुनेछ।नेपाल राष्ट्र बैंकको टक्सार महाशाखाबाट बिक्री हुने यस्ता सिक्का विशेषगरी तिहार, धनतेरस तथा अन्य धार्मिक अवसरमा खरिद गर्ने प्रचलन छ। शुद्धता, तौल र आधिकारिकताप्रतिको विश्वासले पनि सर्वसाधारणलाई राष्ट्र बैंकबाटै सिक्का खरिद गर्न आकर्षित गर्ने गरेको छ।