काठमाडौं, २६ माघ । नेपालमा साना ह्याचब्याक गाडीप्रतिको धारणा बदल्ने कारका रूपमा ह्युन्डाई स्यान्ट्रोले आफ्नो छुट्टै इतिहास बनाएको छ। जापानी ब्रान्डहरूको दबदबा रहेको साना गाडीको बजारमा भारतमा उत्पादन भएको गाडीप्रति उपभोक्ताको विश्वास विस्तारै विकसित हुँदै गर्दा स्यान्ट्रोले नेपाली बजारमा नयाँ सम्भावनाको ढोका खोलेको थियो।

सन् १९९९ मा ह्युन्डाई इन्डियाले आफ्नो पहिलो मोडेलका रूपमा स्यान्ट्रो सार्वजनिक गरेको थियो। दैनिक प्रयोगलाई ध्यानमा राखेर डिजाइन गरिएको, आरामदायी र व्यावहारिक यो गाडी सुरुवातदेखि नै फरक पहिचान बनाउन सफल भयो। विशेष कुरा के थियो भने, नेपाल ह्युन्डाई स्यान्ट्रोको पहिलो निर्यात बजार बनेको थियो, जसले नेपाल र ह्युन्डाई दुवैका लागि गर्वको क्षण सिर्जना गर्‍यो।

स्यान्ट्रोले नेपाली ग्राहकहरूमा ‘सानो गाडी भनेको कमजोर हुन्छ’ भन्ने मानसिकतालाई तोड्दै सानो गाडी पनि भरपर्दो, आकर्षक, मर्मतमा सहज र नेपाली सडक तथा पारिवारिक आवश्यकताअनुसार उपयुक्त हुन सक्छ भन्ने सन्देश दियो। यही कारण स्यान्ट्रो समयसँगै केवल एउटा गाडीमा सीमित रहेन, नेपाली परिवारहरूको भरोसायोग्य साथीको रूपमा स्थापित भयो।

स्यान्ट्रोबाट सुरु भएको विश्वासकै जगमा ह्युन्डाईले नेपालमा आफ्नो ब्रान्ड विस्तार गर्दै आजको अवस्थासम्मको यात्रा तय गरेको छ।

नेपालमा स्यान्ट्रोको २५ वर्ष पूरा भएको अवसरमा ह्युन्डाईले यस ऐतिहासिक मोडेल मात्र होइन, त्यसले निर्माण गरेको भरोसाको विरासतलाई पनि सम्मान गरेको छ। यस विशेष अवसरमा ह्युन्डाई इन्डिया र ह्युन्डाई नेपालको सहकार्यमा सन् २००० मोडेल वर्षका ह्युन्डाई स्यान्ट्रो प्रयोगकर्ताहरूलाई ह्युन्डाई नेपालसँग सम्पर्क गर्न अनुरोध गरिएको छ।

कम्पनीका अनुसार छनोटमा परेका ग्राहकहरूले ह्युन्डाईद्वारा तयार गरिएको विशेष ‘सरप्राइज अनुभव’ प्राप्त गर्ने अवसर पाउनेछन्।