हिमालयन पावर पार्टनर लिमिटेड (एचपीपीएल) ले निष्काशन गरेको ५० प्रतिशत हकप्रद शेयरमा आवेदन दिने आज अन्तिम दिन रहेको छ । कम्पनीले वैशाख १७ गतेदेखि हकप्रद शेयर बिक्री खुला गरेको थियो ।

कम्पनीले हाल कायम चुक्ता पूँजीको ५० प्रतिशत बराबर हकप्रद शेयर जारी गरेको हो । यसअनुसार हाल कायम १ कित्ता शेयर बराबर ०.५ कित्ताका दरले नयाँ शेयर निष्काशन गरिएको छ । कम्पनीले प्रतिकित्ता १०० रुपैयाँ अंकित मूल्यका ५३ लाख २७ हजार ८५ कित्ता हकप्रद शेयर बिक्रीमा ल्याएको हो ।

यसबाट कम्पनीले कुल ५३ करोड २७ लाख रुपैयाँभन्दा बढी पूँजी संकलन गर्ने लक्ष्य राखेको छ । हकप्रद शेयर प्रयोजनका लागि कम्पनीले चैत १० गते बुक क्लोज गरेको थियो । त्यसैले चैत ९ गतेसम्म नेप्सेमा कारोबार भई कायम रहेका शेयरधनीहरूले मात्रै आवेदन दिन पाउने व्यवस्था गरिएको छ ।

कम्पनीलाई केयर रेटिङ्स नेपालले ‘केयर–एनपी डबल बी माइनस’ इस्यूअर रेटिङ प्रदान गरेको छ । यसले कम्पनीको वित्तीय दायित्व वहन क्षमतामा मध्यम स्तरको जोखिम रहेको संकेत गर्ने बताइएको छ ।

हकप्रद शेयरको बिक्री प्रबन्धक ग्लोबल आइएमई क्यापिटल लिमिटेड रहेको छ । लगानीकर्ताले ग्लोबल आइएमई बैंकका विभिन्न शाखा कार्यालयमार्फत आवेदन दिन सक्नेछन् । साथै, सी–आस्बा सेवामा सहभागी बैंक तथा वित्तीय संस्था र ‘मेरो शेयर’ प्रणालीमार्फत अनलाइन आवेदनको सुविधा पनि उपलब्ध रहेको छ ।

हाल कम्पनीको चुक्ता पूँजी १ अर्ब ६ करोड रुपैयाँभन्दा बढी रहेको छ । हकप्रद शेयर बाँडफाँटपछि कम्पनीको चुक्ता पूँजी बढेर करिब १ अर्ब ६० करोड रुपैयाँ पुग्नेछ । कम्पनीले हकप्रदबाट उठ्ने रकम विभिन्न बैंक तथा वित्तीय संस्थाबाट लिएको सहवित्तीयकरण कर्जा भुक्तानीमा प्रयोग गर्ने जनाएको छ ।