नयाँ खाता खोल्नेलाई मात्र होइन, यसअघि नै डिम्याट खाता भएका लगानीकर्ताले पनि केवाईसी विवरण अद्यावधिक गर्दा राष्ट्रिय परिचय नम्बर जोड्नु अनिवार्य हुनेछ। यसले पूँजीबजारमा लगानीकर्ताको पहिचान व्यवस्था एकीकृत र विश्वसनीय बन्ने सिडिएसको भनाइ छ।

पछिल्ला वर्षमा डिम्याट खाता, मेरो सेयर र अनलाइन कारोबारमा आबद्ध लगानीकर्ताको संख्या तीव्र गतिमा बढेको छ। यसैसँगै दोहोरो खाता र गलत विवरणका समस्या पनि बढ्दै गएका थिए। राष्ट्रिय परिचय नम्बरलाई आधार बनाउँदा प्रत्येक लगानीकर्ताको यकिन पहिचान सुनिश्चित हुने र नियामकीय निगरानी सहज बन्ने सिडिएसको अपेक्षा छ।

सिडिएसले लगानीकर्तालाई साउन १ अघि नै राष्ट्रिय परिचय नम्बर बनाई आवश्यक विवरण अद्यावधिक गर्न आग्रह गरेको छ। राष्ट्रिय परिचय नम्बर नभएका लगानीकर्ताले जिल्ला प्रशासन कार्यालयमार्फत परिचय नम्बर लिन सक्छन्।