काठमाडौं,८ असार । नेपालमा विद्युतीय सवारीसाधन (ईभी) प्रति उपभोक्ताको आकर्षण निरन्तर बढिरहेको देखिएको छ। चालु आर्थिक वर्षको पहिलो ११ महिनामा देशभर करिब ११ हजार ईभी आयात भएका छन्।

भन्सार विभागको तथ्यांकअनुसार साउनदेखि जेठसम्म विभिन्न क्षमताका विद्युतीय कार, जीप तथा भ्यान नेपाल भित्रिएका हुन्। जेठ महिनामा मात्रै २ हजार २ सयभन्दा बढी ईभी आयात भएको तथ्यांकले बजारमा विद्युतीय सवारीको माग तीव्र रूपमा बढिरहेको संकेत गरेको छ।

पेट्रोलियम इन्धनको बढ्दो खर्च, सञ्चालनमा कम लागत तथा विस्तार हुँदै गएको चार्जिङ पूर्वाधारका कारण ईभी रोज्ने उपभोक्ताको संख्या बढ्दै गएको व्यवसायीहरूको भनाइ छ। पछिल्ला वर्षहरूमा विभिन्न ब्रान्डका नयाँ मोडल बजारमा आउनु र बैंक तथा वित्तीय संस्थाबाट सहज कर्जा उपलब्ध हुनु पनि ईभी बिक्री बढ्नुका प्रमुख कारण मानिएको छ।

नेपालमा आयात हुने अधिकांश ईभी चीनलगायत अन्य मुलुकबाट आउने गरेका छन्। ईभीको बढ्दो आयातसँगै सरकारले राजस्व संकलनमा समेत उल्लेखनीय योगदान प्राप्त गरेको छ।

पछिल्ला वर्षहरूमा वातावरणमैत्री यातायातप्रति बढ्दो चासोका कारण नेपालमा ईभी बजार तीव्र गतिमा विस्तार भइरहेको छ। विशेषज्ञहरूका अनुसार चार्जिङ स्टेशनको संख्या थप वृद्धि भएमा आगामी वर्षहरूमा ईभीको प्रयोग अझ व्यापक बन्न सक्नेछ।