Dhulikhel Eco Banner new

सीडीएससीमार्फत कर्पोरेट सूचना ‘मेरो शेयर’मा प्रकाशन गर्न सकिने व्यवस्था

884
shares

काठमाडौं, ३ मंसिर । सीडीएस एन्ड क्लियरिङ लिमिटेड (सीडीएससी) ले सार्वजनिक निष्कासन तथा कम्पनीका विभिन्न कर्पोरेट गतिविधिसम्बन्धी सूचना ‘मेरो शेयर’ प्लेटफर्ममार्फत प्रकाशन गर्न सकिने व्यवस्था कार्यान्वयनमा ल्याएको छ।

नयाँ व्यवस्थाअनुसार निष्कासनकर्ता कम्पनी, शेयर निष्कासन तथा बिक्री प्रबन्धक (मर्चेन्ट बैंक) र शेयर रजिस्ट्रारले सी–आस्वा (C-ASBA) प्रणाली प्रयोग गरी सम्बन्धित सूचना सिधै मेरो शेयरमा प्रकाशन गर्न सक्नेछन्।

यस व्यवस्थाअन्तर्गत प्राथमिक सार्वजनिक निष्कासन (आईपीओ), हकप्रद शेयर, बोनस शेयर, लाभांश वितरण, ऋणपत्र परिपक्वतापछि भुक्तानी (रिडेम्प्सन) तथा संस्थापक शेयरको लक–इन अवधिसम्बन्धी विवरण प्रकाशन गर्न सकिनेछ।

यसअघि कम्पनीहरूले यस्ता सूचना विभिन्न माध्यमबाट सार्वजनिक गर्दै आएका थिए। नयाँ व्यवस्थाले सम्बन्धित कम्पनी तथा निष्कासनकर्ताबाट प्रकाशित हुने कर्पोरेट सूचनालाई मेरो शेयर प्लेटफर्ममा उपलब्ध गराउने व्यवस्था गरेको हो।

विशेषगरी संस्थापक तथा स्थानीय बासिन्दाका लागि जारी गरिएका शेयरको लक–इन अवधि समाप्त हुने मिति र सम्बन्धित शेयरको विवरण लगानीकर्ताले मेरो शेयरमार्फत हेर्न सक्ने व्यवस्था गरिएको छ। यसले शेयरधनीलाई आफ्नो शेयरको अवस्था तथा कम्पनीका विभिन्न कर्पोरेट गतिविधिबारे जानकारी प्राप्त गर्न सहज बनाउने उद्देश्य राखेको छ।

यसैगरी, लाभांश वितरण, बोनस शेयर तथा हकप्रद शेयरसम्बन्धी सूचनासमेत एउटै डिजिटल प्लेटफर्ममा उपलब्ध हुने व्यवस्था गरिएको छ। लगानीकर्ताले सम्बन्धित कम्पनीका सूचनाहरू प्राप्त गर्न विभिन्न माध्यममा निर्भर हुनुपर्ने अवस्थालाई यसले कम गर्न सक्ने अपेक्षा गरिएको छ।

नेपालको धितोपत्र बजारमा डिम्याट खाता तथा मेरो शेयर प्रयोगकर्ताको संख्या उल्लेख्य रहेकाले उक्त प्लेटफर्ममार्फत कर्पोरेट सूचना प्रकाशन गर्ने व्यवस्थाले लगानीकर्ताको सूचना पहुँचमा प्रभाव पार्न सक्नेछ।

यद्यपि, सूचनाको नियमितता, विवरणको शुद्धता र अद्यावधिक गर्ने जिम्मेवारी सम्बन्धित निष्कासनकर्ता कम्पनी, मर्चेन्ट बैंक तथा शेयर रजिस्ट्रारको कार्यान्वयनमा निर्भर रहनेछ।

सीडीएससीको यस व्यवस्थाले सार्वजनिक निष्कासन तथा शेयरधनीसँग सम्बन्धित कर्पोरेट गतिविधिको सूचना प्रवाहलाई डिजिटल प्रणालीमार्फत व्यवस्थित गर्ने लक्ष्य राखेको छ।