काठमाडौं — फिफा विश्वकप २०२६ को अन्तिम ३२ अन्तर्गत युरोपियन च्याम्पियन स्पेनले अस्ट्रियालाई ३–० को ठूलो अन्तरले हराउँदै अन्तिम १६ मा प्रवेश गरेको छ। लस एन्जलसमा भएको खेलमा मिकेल ओयारजाबालले जोडी गोल गरे भने पेड्रो पोरोले एउटा गोल थपे। यो जितसँगै सन् २०१० को विश्वकप उपाधिपछि स्पेनले पहिलोपटक नकआउट चरणमा जित हात पारेको छ।

खेलको सुरुआतदेखि नै बलमाथि नियन्त्रण जमाएको स्पेनले लामिन यामालको सक्रियतामा धेरै अवसर सिर्जना गर्‍यो। मार्क कुकुरेलाको एउटा कर्नर प्रयास भने भिएआर समीक्षापछि गोलरक्षकमाथिको फाउलका कारण रद्द भएको थियो। तर ३६औँ मिनेटमा कुकुरेलाकै लो-क्रसलाई ओयारजाबालले पहिलो टचमै गोलमा बदल्दै टोलीलाई अग्रता दिलाए।

पहिलो हाफको अन्त्यतिर एलेक्स बेएनाको फ्रिकिक क्रसबारमा ठोक्किएको थियो भने यामालको प्रहार अस्ट्रियाली गोलरक्षक अलेक्जेन्डर स्लागरले रोकेका थिए। दोस्रो हाफमा पनि आफ्नो लय कायम राखेको स्पेनले ६६औँ मिनेटमा दोस्रो गोल थप्यो, जब बेएनाको क्रसमाथि पेड्रो पोरोले हेडरबाटै जाली चुमाए। यो राष्ट्रिय टोलीका लागि पोरोको पहिलो गोल थियो।

अस्ट्रियाले खेलमा फर्किने प्रयास गरे पनि उल्लेखनीय अवसर बनाउन सकेन। खेल सकिन एक मिनेट बाँकी छँदा कुकुरेलाकै अर्को सहयोगी क्रसमा ओयारजाबालले व्यक्तिगत दोस्रो र टोलीको तेस्रो गोल गर्दै स्कोरलाइन ३–० पुर्‍याए।

यस जितसँगै स्पेनले २०१४ को समूह चरण बहिर्गमन र २०१८, २०२२ को अन्तिम १६ बाटैको निष्कासनको निराशाजनक शृंखला तोडेको छ। साथै चालू विश्वकपमा लगातार चार खेलसम्म गोल नखाने कीर्तिमान पनि स्पेनले बनाएको छ। अब उसले जुलाई ६ मा डलासमा पोर्चुगल र क्रोएसियाबीचको विजेतासँग क्वार्टरफाइनल प्रवेशका लागि खेल्नेछ।