ढाड सोझ्याउन नपाउँदै नेपाली उपभोक्तामाथि फेरि एकपटक इन्धनको भार थपियो। नेपाल आयल निगमले पेट्रोल र डिजेल दुवैको मूल्य प्रतिलिटर ३ रुपैयाँले बढाएको छ। साउन १८ गते बिहान राति १२ बजे एक मिनेटदेखि नयाँ मूल्य लागू हुनेछ।

नयाँ मूल्यअनुसार पहिलो वर्गमा पेट्रोल र डिजेल दुवैको मूल्य प्रतिलिटर १७१ रुपैयाँ ५० पैसा कायम गरिएको छ। दोस्रो वर्गमा प्रतिलिटर १९९ रुपैयाँ र तेस्रो वर्गमा २०० रुपैयाँ तोकिएको छ। मट्टितेलको मूल्य पनि डिजेलसरह नै राखिएको छ।

हवाई इन्धनको मूल्य पनि बढेको छ। आन्तरिक उडानतर्फ प्रतिलिटर २४९ रुपैयाँ कायम गरिएको छ भने अन्तर्राष्ट्रिय उडानतर्फ काठमाडौंका लागि प्रतिकिलोलिटर १ हजार ९६७ अमेरिकी डलर, पोखराका लागि १ हजार ९२३ डलर र भैरहवाका लागि १ हजार ९२२ डलर तोकिएको छ। एलपी ग्यासको मूल्य भने यसपटक अपरिवर्तित राखिएको छ।

मूल्य वृद्धिको कारण अन्तर्राष्ट्रिय बजार बताइएको छ। इन्डियन आयल कर्पोरेसनले जुलाई ३१ मा दिएको नयाँ खरिद मूल्यअनुसार पेट्रोलमा प्रतिलिटर २ रुपैयाँ ११ पैसा र डिजेलमा ३ रुपैयाँ ६७ पैसा लागत बढेको निगमले जनाएको छ। तर उपभोक्तामाथि पूरै भार नथुपार्ने उद्देश्यले आंशिक समायोजन मात्र गरिएको निगमको भनाइ छ।

आंशिक समायोजन गरे पनि निगमको घाटा भने रोकिने अवस्था छैन। मूल्य समायोजनपछि पनि मासिक करिब १ अर्ब ४८ करोड रुपैयाँ घाटा हुने निगमको अनुमान छ। अन्तर्राष्ट्रिय बजारमा मूल्य वृद्धिको क्रम जारी रहेकाले निगमले उपभोक्तालाई पेट्रोलियम पदार्थको मितव्ययी उपयोग गर्न आग्रह गरेको छ।