उद्योग विभाग का अनुसार चालु आर्थिक वर्षको पहिलो १० महिनामा नेपालमा ४५ अर्ब ३२ करोड रुपैयाँभन्दा बढी प्रत्यक्ष वैदेशिक लगानी (एफडीआई) प्रतिबद्धता आएको छ । साउनदेखि वैशाखसम्म ७२८ परियोजनामार्फत उक्त लगानी प्रतिबद्धता आएको विभागले जनाएको हो ।

तथ्यांकअनुसार सबैभन्दा धेरै लगानी प्रतिबद्धता कृषिमूलक उद्योग क्षेत्रमा देखिएको छ । १६ वटा कृषिसम्बन्धी परियोजनामा मात्रै २२ अर्ब रुपैयाँभन्दा बढी लगानी प्रतिबद्धता आएको छ । पछिल्लो समय कृषि तथा कृषि प्रशोधन क्षेत्रमा विदेशी लगानीकर्ताको आकर्षण बढ्दै गएको संकेत यसले गरेको छ ।

पर्यटन क्षेत्र पनि विदेशी लगानीको प्रमुख गन्तव्य बनेको छ । १८९ पर्यटनसम्बन्धी परियोजनामा १२ अर्ब ५४ करोड रुपैयाँभन्दा बढी लगानी प्रतिबद्धता आएको विभागको तथ्यांक छ । त्यस्तै सेवा, उत्पादन, पूर्वाधार र सूचना प्रविधि क्षेत्रमा पनि लगानी प्रस्ताव आएको छ ।

सूचना प्रविधि क्षेत्रमा सबैभन्दा धेरै ४२१ परियोजना दर्ता भए पनि लगानी रकम भने तुलनात्मक रूपमा कम देखिएको छ । उक्त क्षेत्रमा एक अर्ब ७४ करोड रुपैयाँ बराबरको प्रतिबद्धता आएको विभागले जनाएको छ । ऊर्जा र खनिज क्षेत्रमा भने लगानी आकर्षण न्यून देखिएको छ ।

वैशाख महिनामा मात्रै ११३ परियोजनामार्फत तीन अर्ब ५२ करोड रुपैयाँभन्दा बढी विदेशी लगानी प्रतिबद्धता आएको तथ्यांकले देखाएको छ । सरकारले लगानीमैत्री वातावरण बनाउने दाबी गरिरहे पनि प्रतिबद्ध लगानी वास्तविक रूपमा कार्यान्वयन हुने चुनौती भने अझै कायम छ ।