लगातार ६ कारोबार दिनदेखि ओरालो लागिरहेको सेयर बजारमा मंगलबार केही राहत महसुस गरिएको छ। झन्डै साढे नौ अंकको सामान्य सुधारसँगै नेप्से परिसूचक २५२२.६६ विन्दुमा पुगेर अडेको छ। निरन्तरको गिरावट पछि आएको यो हरियालीले बजारमा थप गिरावट रोकिन सक्ने झिनो आशा त जगाएको छ, तर कारोबार रकममा आएको संकुचनले लगानीकर्तामा अझै पूर्ण आत्मविश्वास फर्किसकेको देखिँदैन। सोमबार साढे तीन अर्ब नाघेको कारोबार रकम मंगलबार खुम्चिएर २ अर्ब ९० करोड रुपैयाँमा सीमित हुन पुग्यो।

हिजोको बजार बन्द भएपछिको दैनिक चार्टलाई प्राविधिक रूपमा विश्लेषण गर्दा नेप्सेमा ‘स्पिनिङ टप’ प्रकृतिको क्यान्डल निर्माण भएको छ। २५१८.१३ विन्दुबाट खुलेर न्यूनतम २५०१.४९ सम्म ओर्लिएको बजार अन्त्यमा खरिदकर्ताको सामान्य प्रभावका कारण सकारात्मक बनेर बन्द भएको थियो। चार्टमा माथि र तल दुवैतर्फ लामो छायाँ र बीचमा सानो बडी भएको यस्तो क्यान्डल बन्नुले बजारमा खरिदकर्ता र बिक्रेताबीच तीव्र प्रतिस्पर्धा रहेको देखाउँछ। प्राविधिक विश्लेषकहरुका अनुसार, लगातारको भारी गिरावटपछि यस्तो आकृति बन्दा बजारले तत्कालका लागि टेवा पाएको र छोटो अवधिको प्राविधिक सुधार (टेक्निकल बाउन्स) हुन सक्ने सम्भावना रहन्छ। यद्यपि, लगानीकर्ताहरु आगामी दिशालाई लिएर अझै अनिर्णयको बन्दी अवस्थामै रहेको पनि यसले संकेत गर्छ।

बजारमा सामान्य अंकको वृद्धि देखिए पनि समग्र प्राविधिक संरचना भने अझै पूर्ण रूपले दबाबमुक्त भइसकेको छैन। बजारले विगत केही समयदेखि स्पष्ट रूपमा ‘लोअर हाई’ र ‘लोअर लो’ को शृंखला बनाउँदै ओरालो यात्रा तय गरिरहेको छ। घट्दो बजारमा कोरिएका ट्रेन्डलाइनहरुले सूचक अझै पनि जोखिमकै रेखामुनि रहेको देखाउँछन्। अर्कोतर्फ, प्राविधिक विश्लेषणको सर्वमान्य सिद्धान्त अनुसार ट्रेन्ड परिवर्तन हुनका लागि नेप्सेको वृद्धिलाई कारोबार रकम (भोल्युम) ले बलियो साथ दिनुपर्ने हुन्छ। न्यून कारोबार रकमसहित आएको यो सामान्य अंकको वृद्धिले तत्कालै बजार ‘बुलिस ट्रेन्ड’ मा प्रवेश गरिहाल्ने ग्यारेन्टी गर्दैन। आगामी दिनमा उच्च भोल्युमसहितको स्पष्ट सकारात्मक क्यान्डल नबनेसम्म बजार फर्कियो भनेर ढुक्क हुन सकिने अवस्था नरहेको विश्लेषकहरुको भनाइ छ।

अबका दिनमा बजारले सकारात्मक लय समातिहालेको खण्डमा पनि नेप्सेले उकालो यात्रा तय गर्न केही महत्वपूर्ण प्राविधिक अवरोधहरु पार गर्नुपर्ने चुनौती छ। चार्टको प्रवृत्ति अनुसार बजारको पहिलो बलियो अवरोध (रेजिस्टेन्स) २६७३.१४ विन्दुमा रहेको छ। यदि खरिदकर्ताको चाप बढेर नेप्सेले सफलतापुर्वक यो विन्दुलाई पार गर्न सकेमा क्रमशः २७५४.०८ र २८०१ विन्दुमा थप महत्वपूर्ण प्राविधिक अवरोधहरु सामना गर्नुपर्ने हुन्छ। समग्रमा भन्नुपर्दा, हिजो बनेको क्यान्डलले बजार थप घट्नबाट रोकिने प्रारम्भिक संकेत गरे तापनि दिगो सुधारका लागि आगामी कारोबार दिनको प्रवृत्ति र भोल्युमको साथ कस्तो रहन्छ भन्ने कुराले नै बजारको भावी यात्रा तय गर्नेछ।