काठमाडौं, १३ कार्तिक। कृत्रिम बौद्धिकता (एआई) को तीव्र विकासले विश्वका ठूला प्रविधि कम्पनीहरूको परम्परागत व्यवसायमा चुनौती थप्न थालेको छ । यसको प्रभाव गुगलको मूल कम्पनी अल्फाबेटको सेयर बजारमा समेत देखिएको छ । कम्पनीले एकै दिन ५०० अर्ब डलरभन्दा बढी बजार मूल्य गुमाएको छ ।

वर्षको अन्तिम व्यावसायिक प्रतिवेदन सार्वजनिक भएपछि लगानीकर्तामा निराशा बढ्दा बिहीबार अल्फाबेटको सेयर मूल्य पछिल्लो ६ महिनायताकै न्यून विन्दुमा झरेको हो ।

विशेषगरी गुगल सर्चमा एआई प्रयोग गरेर तयार गरिने सारांशका कारण विज्ञापनबाट प्राप्त हुने आम्दानी प्रभावित भइरहेको कम्पनीले खुलासा गरेपछि लगानीकर्ताको चिन्ता थपिएको छ ।

यसै साता माइक्रोसफ्ट र अमेजनले पनि आफ्नो व्यावसायिक प्रगतिको विवरण सार्वजनिक गरेका थिए । यी तीनवटै प्रविधि कम्पनीले एआई प्रतिस्पर्धामा ठूलो रकम लगानी गर्ने योजना अघि सारेका छन् । तर, एआईमा भइरहेको ठूलो लगानीले कम्पनीहरूको परम्परागत व्यवसायको वृद्धि र आम्दानी क्षमतामा कस्तो प्रभाव पार्छ भन्ने विषय लगानीकर्ताका लागि चासोको विषय बनेको छ ।

सर्च व्यवसायमै एआईको चुनौती

पहिलो दृष्टिमा अल्फाबेटको त्रैमासिक वित्तीय नतिजा कमजोर देखिँदैन । गत वर्षको सोही अवधिको तुलनामा कम्पनीको कुल आम्दानी २५ प्रतिशतले वृद्धि भई १२७ अर्ब ६० करोड डलर पुगेको छ ।

कम्पनीको आम्दानी वृद्धिमा गुगल क्लाउड व्यवसायको विस्तारले महत्वपूर्ण योगदान दिएको छ । उक्त व्यवसायको आम्दानी १०३ प्रतिशतले बढेर करिब ३१ अर्ब डलर पुगेको अल्फाबेटले जनाएको छ ।

यद्यपि, आम्दानीमा वृद्धि भए पनि कम्पनीको नाफामा भने उल्लेख्य गिरावट आएको छ । समीक्षाधीन त्रैमासिक अवधिमा अल्फाबेटको नाफा २५ प्रतिशतले घटेको छ ।

त्यस्तै, सार्वजनिक कम्पनी बनेयता दोस्रोपटक अल्फाबेटले ऋणात्मक स्वतन्त्र नगद प्रवाह (फ्री क्यास फ्लो) देखाएको छ । यसपटक कम्पनीको स्वतन्त्र नगद प्रवाह ९ अर्ब डलरभन्दा बढी ऋणात्मक भएको छ ।

यो रकम तीन महिनाअघिको तुलनामा झन्डै दोब्बर हो ।

एआई प्रविधिमा तीव्र रूपमा भइरहेको लगानी र कम्पनीको मुख्य आम्दानीको स्रोत मानिने गुगल सर्च व्यवसायमै त्यसको प्रभाव देखिन थालेपछि अल्फाबेटको भविष्यको आम्दानी क्षमतामाथि लगानीकर्ताले प्रश्न उठाउन थालेका छन् ।