लघुवित्तविरुद्धको अराजक समूहसँग वार्तामा बस्न अर्थले माग्यो गृहको साथ
वि.सं.२०८० साउन १३ शनिवार ००:०२
shares
काठमाडौं, १२ साउन । लघुवित्त पीडितसँग वार्ताका लागि समन्वय गरिदिन अर्थमन्त्रालयले गृह मन्त्रालयलाई पत्राचार गरेको छ । लघुवित्त पीडितहरुले अहिले आन्द्योलन गरिरहेका छन् । केही पूरा हुँनै नसक्ने मागहरु समेत राखेर आन्दोलनमा होमिएकाहरुसँग वार्ता गर्न अर्थमन्त्रालयले एक समिति बनाएको छ ।
मन्त्रालयले बनाएको वार्ता समितिको संयोजक वित्तीय व्यवस्थापन महाशाखाका सहसचिव भुपाल बराल छन् भने गृहमन्त्रालय, कानून मन्त्रालय र राष्ट्र बैंकका प्रतिनिधि उक्त समितिको सदस्य रहने भनिएको छ । सो वार्ता समितिसँग वार्तामा बस्नका लागि अर्थमन्त्रालयले बिहीबार गृहलाई पत्राचार गरेको हो । अर्थ मन्त्रालयकी शाखा अधिकृत अनिता शाहले हस्ताक्षर गरेको पत्रको बोधार्थ काठमाडौंका सीडीओलाई समेत दिइएको छ ।
लघुवित्त वित्तीय संस्थाहरु भनेका बैंक तथा वित्तीय संस्था सम्बन्धी ऐन अनुसार सञ्चालित संस्था हुन् । यि संस्थाहरुको नियमन तथा सुपरीवेक्षण नेपाल राष्ट्र बैंकले गर्छ । लघुवित्त पीडित भनिएकाहरु कतिपय अराजक समेत छन् । उनीहरुका केही मागहरु जायज भएपनि लघुवित्त संस्थाहरुको खारेजी, ऋण लिए पछि तिर्न नपर्ने जस्ता पूरा हुनै नसक्ने मागहरु समेत अघि तेर्साएका छन् ।