काठमाडौं, १५ फागुन । नेपालले चालु आर्थिक वर्ष २०८१/८२ को सात महिनामा १५ अर्ब १० करोड ५१ लाख ३७ हजार रुपैयाँ खर्च गरेर १ लाख ६७ हजार २२८ मेट्रिक टन कृषि उत्पादनको बीउ आयात गरेको छ। यसमा टमाटर, सूर्यमुखी, उखु, प्याज, विभिन्न सजावटका फूल, तरकारी र विभिन्न खाद्यान्न बालीका बीउ प्रमुख रूपमा रहेका छन्।

यसको साथमा, सरकारले २ अर्ब ६ करोड ८३ लाख ३१ हजार रुपैयाँको राजस्व पनि संकलन गरेको छ। यो बीउ भारत, चीन, पाकिस्तान, टर्की, कोरिया लगायतका मुलुकबाट आयात गरिएको भन्सार विभागले जानकारी दिएको छ।

हालका दिनमा, किसानहरूले रैथाने बीउको सट्टा हाइब्रिड बीउ प्रयोग गर्ने प्रवृत्ति बढेको छ। हाइब्रिड बीउबाट एक उत्पादन मात्रै लिन सकिन्छ, जसले गर्दा नेपालले बर्षेनी अर्बोको कृषि उपजको बीउ आयात गर्नुपर्ने स्थिति बनिरहेको छ।

गत वर्ष २०८०/८१ मा मात्र २१ अर्ब ७७ करोड रुपैयाँको कृषिजन्य वस्तुको बीउ आयात गरिएको थियो। यसले नेपालको कृषिमा बाह्य निर्भरता र आयातको मापदण्डलाई प्रस्ट बनाएको छ।