पोर्चुगिज फुटबल स्टार Cristiano Ronaldo साउदी अरेबियन क्लब Al Nassr FC मा आबद्ध भएपछि पहिलोपटक टोलीले साउदी प्रो–लिगको उपाधि जित्न सफल भएको छ। सन् २०२३ मा इंग्लिस क्लब Manchester United छाडेर रोनाल्डो अल नासर पुगेका थिए। त्यसयता क्लबले पहिलो पटक लिग उपाधि हात पारेको हो।

बिहीबार सम्पन्न खेलमा अल नासरले Damac FC लाई ४–१ गोल अन्तरले पराजित गर्दै उपाधि सुनिश्चित गर्‍यो। घरेलु मैदान अल अव्वल पार्कमा भएको खेलमा क्रिस्टियानो रोनाल्डोले दुई गोल गरे भने साडियो माने र किङ्स्ले कोम्यानले समान एक–एक गोल थपे। डमाकका लागि मोर्ले सिल्लाले एक गोल फर्काए।

खेलको २०औँ मिनेटमा साडियो मानेले गोल गर्दै अल नासरलाई सुरुआती अग्रता दिलाएका थिए। त्यसपछि ५१औँ मिनेटमा किङ्स्ले कोम्यानले गोल थपेपछि घरेलु टोली बलियो अवस्थामा पुगेको थियो।

डमाकले ५७औँ मिनेटमा पेनाल्टीमार्फत एक गोल फर्काउँदै खेलमा फर्किने प्रयास गरेको थियो। तर त्यसपछि रोनाल्डोले लगातार दुई गोल गर्दै अल नासरको जित पक्का गरे। उनले ६२औँ र ८०औँ मिनेटमा गोल गरेका थिए।

यो जितसँगै अल नासरले ३४ खेलबाट ८६ अंक जोड्दै लिग तालिकाको शीर्ष स्थान कब्जा गर्‍यो। दोस्रो स्थानमा रहेको Al Hilal SFC भन्दा अल नासर दुई अंकले अगाडि रह्यो। पराजित डमाक भने २९ अंकसहित रेलिगेसनमा परेको छ।