काठमाडौं,११ कार्तिक। वीरगञ्ज भन्सार कार्यालयले चालु आर्थिक वर्ष २०८३/८४ को असोज महिनामा राजस्व संकलनको लक्ष्य पार गरेको छ। कार्यालयले एक महिनामा २६ अर्ब ७२ करोड ५८ लाख रुपैयाँ राजस्व संकलन गरेको हो।

 भन्सार विभागले असोज महिनाका लागि २६ अर्ब ४६ करोड रुपैयाँ राजस्व संकलन गर्ने लक्ष्य निर्धारण गरेको थियो। कार्यालयले निर्धारित लक्ष्यभन्दा २६ करोड ५८ लाख रुपैयाँ बढी राजस्व संकलन गरेको हो। यो मासिक लक्ष्यको करिब १०१ प्रतिशत हो।

वीरगञ्ज भन्सार कार्यालयका प्रमुख भन्सार प्रशासक कृष्णप्रसाद मैनालीका अनुसार असोज महिनामा इन्धन आयातबाट मात्रै २ अर्ब २९ करोड रुपैयाँ राजस्व प्राप्त भएको छ।

त्यस्तै, खाना पकाउने एलपीजी ग्यासको आयातबाट १ अर्ब ८० करोड रुपैयाँ र अलकत्रा (बिटुमिन) आयातबाट १ अर्ब ४० करोड रुपैयाँ राजस्व संकलन भएको छ। स्याउ तथा नास्पाति आयातबाट पनि ५० करोड रुपैयाँ राजस्व प्राप्त भएको कार्यालयले जनाएको छ।

तीन महिनाको लक्ष्य भने पूरा भएन

असोजमा मासिक लक्ष्य पार गरे पनि चालु आर्थिक वर्षको पहिलो तीन महिनाको समग्र राजस्व संकलन भने लक्ष्यभन्दा कम छ।

कार्यालयका अनुसार साउनदेखि असोजसम्म ७० अर्ब ५६ करोड रुपैयाँ राजस्व संकलन गर्ने लक्ष्य रहेकामा ६९ अर्ब १३ करोड रुपैयाँ मात्रै संकलन भएको छ। यसअनुसार तीन महिनाको अवधिमा लक्ष्यभन्दा १ अर्ब ४३ करोड रुपैयाँ कम राजस्व उठेको छ।

यसरी असोज महिनामा लक्ष्यभन्दा बढी राजस्व संकलन भए पनि पहिलो त्रैमासको समग्र लक्ष्य पूरा गर्न वीरगञ्ज भन्सार कार्यालयले आगामी महिनामा राजस्व संकलन बढाउनुपर्ने देखिएको छ।