Dhulikhel Eco Banner new

बुढीगण्डकी जलविद्युत् आयोजनामा यूएईको लगानी प्रस्ताव, गृहमन्त्री गुरुङले गरे छलफल

533
shares

काठमाडौं, २९ कात्तिक। गृहमन्त्री सुदन गुरुङले संयुक्त अरब इमिरेट्स (यूएई) का वैदेशिक व्यापारमन्त्री डा. थानी बिन अहमद अल जायुदीसँग भेटवार्ता गरेका छन् ।

अबुधाबीमा भएको भेटवार्तामा दुई देशबीचको व्यापार, लगानी तथा आर्थिक सहकार्य विस्तारका विषयमा छलफल भएको हो ।

भेटका क्रममा गृहमन्त्री गुरुङले नेपालको बुढीगण्डकी जलविद्युत् आयोजनामा यूएईको लगानीका लागि प्रस्ताव गरेका छन् । त्यसैगरी कृषि तथा सेवा क्षेत्रमा समेत दुई देशबीच सहकार्य र लगानीका सम्भावनाबारे उनले चर्चा गरेका थिए ।

गुरुङले सुरक्षा प्रविधिको क्षेत्रमा पनि सहकार्य गर्न सकिने सम्भावना औंल्याएका छन् । विशेषगरी फेसलेस पुलिसिङ (प्रत्यक्ष सम्पर्कबिनाको प्रहरी सेवा), गैरघातक सुरक्षा उपकरणको प्रयोग तथा नेपालको सुरक्षा निकायको आधुनिकीकरणका विषयमा उनले यूएईसँग सहकार्यको प्रस्ताव राखेका हुन् ।

भेटवार्तामा दुवै पक्षले प्रस्तावहरू औपचारिक रूपमा आदानप्रदान गर्दै आवश्यक प्रक्रिया अघि बढाउने विषयमा सकारात्मक धारणा व्यक्त गरेका छन् ।

नेपाल र यूएईबीच व्यापार, लगानी तथा सुरक्षा सहकार्यलाई थप विस्तार गर्ने दिशामा यो भेटवार्तालाई महत्त्वपूर्ण रूपमा हेरिएको छ ।