काठमाडौं, ३१ साउन । प्राकृतिक विपद् र अनपेक्षित चुनौतीहरूलाई पार गर्दै, नेपालले प्रविधिमा अर्को फड्को मारेको छ। नाडा अटोमोबाइल्स एशोसिएसन अफ नेपालले गर्वका साथ घोषणा गरेको छ कि भविष्यको मोबिलिटीको प्रतीक डिपाल भक्ति फ्लाइङ ट्याक्सी र अत्याधुनिक युनिट्री रोबोट्स अहिले सुरक्षित रूपमा काठमाडौं आइपुगेका छन्।

यी उच्च प्रविधियुक्त साधनहरू नेपालमै पहिलोपटक सार्वजनिक प्रदर्शनमा ल्याइने भएका छन्। नाडा अटो शो २०२५ मार्फत दर्शकहरूले यो ऐतिहासिक प्रविधिको प्रत्यक्ष अनुभव गर्न सक्नेछन्।

यसपटकको १७औं संस्करणको नाडा अटो शो केवल सवारीसाधनको प्रदर्शनी मात्र नभई नेपालको दृढता, नवीनता र भविष्यप्रतिको दृष्टिकोणको जीवन्त प्रतीक बन्ने आयोजकको विश्वास छ।

२०८२ भदौ ३ देखि ८ गते (१९–२४ अगस्ट २०२५) सम्म काठमाडौंको भृकुटीमण्डप प्रदर्शनी स्थलमा हुने यो कार्यक्रममा साना ठूला विभिन्न अटोमोबाइल कम्पनीहरू, नयाँ प्रविधि र सस्टेनेबल मोबिलिटी समाधानहरू प्रस्तुत गरिनेछ।

नाडाका पदाधिकारीहरूका अनुसार, तातोपानी क्षेत्रमा देखिएका प्राकृतिक विपद् र कठिनाइहरू पार गर्दै पनि यस्ता अत्याधुनिक प्रविधिहरू नेपाल भित्र्याउन सफल हुनु आफैंमा एउटा ऐतिहासिक उपलब्धि हो।

यो शोले नेपालको अटोमोबाइल र प्रविधि क्षेत्रलाई नयाँ उचाइमा पुर्‍याउने अपेक्षा गरिएको छ।