काठमाडौं, २० साउन । वालिङ नगरपालिकाका किसानले अब आफ्ना तरकारी तथा कृषि उपज बोकेर बजार धाउनुपर्ने बाध्यता अन्त्य हुने भएको छ।

नगरपालिकाले वालिङ–१ स्थित त्रियासी कृषि उपज बजार व्यवस्थापन सहकारी संस्थालाई कृषि एम्बुलेन्स हस्तान्तरण गरेसँगै किसानका उत्पादन घर–आँगनबाटै संकलन गरी बजारसम्म पुर्‍याउने सेवा सुरु गरेको हो।

वालिङ नगरपालिका, हेफर इन्टरनेसनल नेपाल र दियालो संस्था ९वालिङ कृषि विकास परियोजना० को साझेदारीमा ३२ लाख ९ हजार रुपैयाँ लागतमा कृषि एम्बुलेन्स खरिद गरिएको हो। यसमध्ये नगरपालिकाले १८ लाख ९ हजार र परियोजनाले १४ लाख रुपैयाँ व्यहोरेका छन्।

प्रमुख प्रशासकीय अधिकृत जीवन ज्ञवालीका अनुसार यो सेवा कृषि उत्पादनको संकलन, ढुवानी, भण्डारण र बजारीकरणलाई आधुनिक तथा व्यवस्थित बनाउने उद्देश्यले सञ्चालनमा ल्याइएको हो।

“कृषि उत्पादनलाई खेतदेखि बजारसम्म जोड्ने यो सेवा किसानमैत्री कार्यक्रम हो। अब किसानले उत्पादन बिक्रीका लागि ढुवानीको चिन्ता गर्नुपर्ने अवस्था रहने छैन,” ज्ञवालीले भने।

हाल सहकारीमार्फत दैनिक करिब ५० क्विन्टल तरकारी संकलन हुँदै आएको छ। कृषि एम्बुलेन्स सञ्चालनमा आएपछि किसानको घरबाटै तरकारी उठाइने भएकाले ढुवानी खर्च घट्ने, समय बचत हुने र उत्पादन ताजा अवस्थामै बजार पुग्ने अपेक्षा गरिएको छ।

सहकारीका अध्यक्ष अर्जुनप्रकाश अर्यालले ढुवानी अभावका कारण किसानले वर्षौंदेखि भोग्दै आएको समस्या अब समाधान हुने विश्वास व्यक्त गरे।“पहिले ढुवानी नहुँदा धेरै तरकारी कुहिन्थ्यो, बजारसम्म पुर्‍याउन कठिन हुन्थ्यो। अब कृषि एम्बुलेन्समार्फत पोखरा र बुटवलसम्म नियमित रूपमा तरकारी पठाउन सक्ने अवस्था बनेको छ,” उनले भने।

वालिङ नगरपालिकाले उत्पादित तरकारीको न्यूनतम समर्थन मूल्य निर्धारण गर्नुका साथै उत्पादनका आधारमा प्रतिकिलो ५ रुपैयाँ अनुदान पनि उपलब्ध गराउँदै आएको छ। गत आर्थिक वर्षको ११ महिनामा मात्रै ७ लाख ९१ हजार ३४२ रुपैयाँ नगद अनुदान किसानलाई वितरण गरिएको थियो।

सहकारीका प्रबन्धक युवराज रेग्मीका अनुसार गत वर्ष १ लाख ५८ हजार २ सय ६८ केजी तरकारी सहकारीमार्फत संकलन भएको थियो।“कृषि एम्बुलेन्सले एकै पटक करिब १३० क्रेट तरकारी ढुवानी गर्न सक्छ। यसले ढुवानी लागत घटाउने मात्र होइन, किसानलाई व्यावसायिक खेतीतर्फ अझ आकर्षित गर्नेछ,” उनले बताए।

नगरपालिकाको विश्वास छ कि कृषि एम्बुलेन्स सञ्चालनसँगै उत्पादनदेखि बजारसम्मको कृषि आपूर्ति शृङ्खला थप सुदृढ हुनेछ। यसले विशेषगरी साना तथा व्यावसायिक किसानको बजार पहुँच विस्तार गर्दै आम्दानी वृद्धि गर्न महत्वपूर्ण योगदान पुर्‍याउने अपेक्षा गरिएको छ।

हेफर परियोजना नेपालका वरिष्ठ कार्यक्रम अधिकृत विष्णु प्रसाद पाण्डेका अनुसार यो पहलले कृषि क्षेत्रको व्यावसायीकरणमा समेत टेवा पुग्नेछ।