विश्व स्वास्थ्य संगठन (डब्ल्यूएचओ)ले प्रजातान्त्रिक गणतन्त्र कंगोको पूर्वी इटुरी प्रान्तमा फैलिएको इबोला संक्रमणलाई अन्तर्राष्ट्रिय चासोको सार्वजनिक स्वास्थ्य संकटकाल घोषणा गरेको छ । हालसम्म २४६ संदिग्ध संक्रमित र ८० जनाको मृत्यु रिपोर्ट भइसकेको डब्ल्यूएचओले जनाएको छ ।

संगठनका अनुसार संक्रमण ‘बुन्डिबुग्यो’ नामक इबोला भाइरस प्रजातिबाट फैलिएको हो । यो भाइरसका लागि हालसम्म कुनै स्वीकृत खोप वा प्रभावकारी औषधि उपलब्ध छैन । राजधानी बुनियासहित खानी क्षेत्र आसपासका स्थानमा संक्रमण फैलिन थालेपछि स्वास्थ्य जोखिम बढेको बताइएको छ ।

डब्ल्यूएचओले छिमेकी देश युगान्डामा पनि संक्रमण पुष्टि भइसकेकाले रोग सीमापार फैलिने जोखिम उच्च रहेको चेतावनी दिएको छ । संक्रमण नियन्त्रणका लागि निगरानी बढाउने, संक्रमितलाई तुरुन्त आइसोलेसनमा राख्ने र ‘कन्ट्याक्ट ट्रेसिङ’ तीव्र पार्न कंगो र युगान्डालाई आग्रह गरिएको छ ।

इबोला पहिलोपटक सन् १९७६ मा कंगोमै पत्ता लागेको थियो । शरीरका तरल पदार्थको सम्पर्कबाट फैलिने यो भाइरसले गम्भीर रक्तस्राव, अंग निष्क्रिय हुने समस्या र उच्च मृत्युदर निम्त्याउने गर्छ । डब्ल्यूएचओका अनुसार इबोलाको औसत मृत्युदर करिब ५० प्रतिशतसम्म रहने गरेको छ ।